Өңірде облыс әкімі Ермек Маржықпаевтың қатысуымен Қазақстан халқының бірлігі мерекесіне арналған бірқатар іс-шаралар өткізілді

Өңір басшысы Қазақстан халқы Ассамблеясының мүшелерімен кездесіп, олардың бірлік пен келісімді нығайтуға, қайырымдылықты дамытуға және «30 игі іс» республикалық акциясын қолдауға қосқан елеулі үлесі үшін алғыс білдірді.

Көкшетау қаласының Достық үйінде облыс әкімінің Тәуелсіздік құрдастарымен, этномәдени бірлестіктердің жастар клубтарының өкілдерімен кездесуі де жарқын іс-шара болды.

Ермек Маржықпаев өзінің құттықтау сөзінде қатысушыларды құттықтай отырып, жастардың ел дамуына қосқан елеулі үлесін атап өтті.
«Біз біртұтас халық бола отырып, Тәуелсіздік жылдарында Елбасы Нұрсұлтан Әбішұлы Назарбаевтың дана саясатының арқасында егемендігімізді нығайтып, елімізде бейбітшілік пен келісімді сақтадық. Бүгін атап өтілетін Қазақстан халқының бірлігі мерекесі осыған дәлел болып табылады. Бұл мереке бүгінгі жастар мен Тәуелсіздіктің құрдасы үшін маңызды мереке болып саналады. Сіздер түрлі этностар жастарының өкілдері ретінде қоғамдағы достықты, бейбітшілік пен келісімді нығайтуға өз үлесіңізді қосасыздар», - деп атап өтті облыс әкімі.

Кездесу барысында жастар атынан «Санги-Кабуд» тәжік этномәдени орталығының басшысы, облыстық мәслихаттың жас депутаты Омар Шоназаров, Ақмола ассамблеясы жанындағы «Жаңғыру жолы» жастар қозғалысының жетекшісі Аслан Әбутәлібов, Біржан сал атындағы Көкшетау музыкалық колледжінің студенті Юрий Кочетыгов және басқалар сөз сөйледі. «Мен Көкшетауда туып өстім. Кішкентай кезімнен ата-анам мені қазақ балабақшасына, содан кейін қазақ мектебіне берді. Бүгін мен бұл үшін ата-анама ризамын. Өйткені, мемлекеттік тіл мен қазақ мәдениетін білудің арқасында мен өзім үшін көптеген қызықты нәрселерді біле алдым. Қазір домбырада еркін ойнаймын», - деді Юрий Кочетыгов.

Іс-шара соңында қатысушылар Достық үйінің аумағында арбат аралап, Қазақстан халқы Ақмола ассамблеясының сәндік-қолданбалы өнер шеберлері одағы бұйымдарының және жергілікті суретшілердің шығармашылық жұмыстарының көрмесі ұйымдастырылды.

• 30.04.2021
• 246