МАҢҒЫСТАУ ОБЛЫСЫ БІЛІМ БАСҚАРМАСЫНЫҢ БАСШЫСЫ СВЕТЛАНА ТӨЛЕБАЕВА: СОҢҒЫ ҚОҢЫРАУДЫ ӨТКІЗУ ФОРМАТЫ ТУРАЛЫ ШЕШІМДІ ӘР МЕКТЕП ӨЗІ ҚАБЫЛДАЙДЫ

Биыл Маңғыстау облысында соңғы қоңырау рәсімі 25 мамыр күні барлық санитарлық талапты сақтай отырып, өңірдің бас санитарлық дәрігерінің келісімімен өткізіледі. Соңғы қоңырауды ұйымдастыру форматы туралы шешімді әр мектеп өзі қабылдайды. Бұл туралы Қоғамдық коммуникация орталығында өткен брифингте Маңғыстау облысы білім басқармасының басшысы Светлана Төлебаева мәлім етті.

Оның айтуынша, қорытынды аттестаттау аяқталған соң 12-14 маусым аралығында мектеп түлектері үшін ашық алаңда мектеп бітіру кештері ұйымдастырылады.

«Мектеп бітіру кештері биыл «Тәуелсіздік ұландары» тақырыбында өтеді. Орта білім  туралы аттестаттар салтанатты жиында табысталады. Оқушылар саны аз мектептер бітіру кешін барлық сынып үшін бір уақытта өткізе алады. Егер түлектер саны көп болса, салтанатты шараны әр түрлі күндерде өткізуді қарастыру қажет. Шара барысында маскалық режим, әлеуметтік арақашықтық т. с. с. санитарлық ережелер сақталуы тиіс», - деді Светлана Төлебаева.

Айта кетейік, биыл өңірде 11 сыныпты 7011 түлек бітіреді. Алтын белгіге 227 үміткер, үздік аттестатқа 359 үміткер бар.

• 13.05.2021
• 265