Құрметті жерлестер!

Лесхоз кентінде өрттен зардап шеккен барлық отбасылар Риддер қаласының жаңа шағын ауданында бой көтеретін жаңа тұрғын үйлерге ие болады. Осы аптада бірқабатты баспаналардың құрылысы басталады. Бір тұрғын үйдің жалпы ауданы 80 м² құрайды, әрқайсысының жеке учаскесі болады.

Құрылысы аяқталмаған көпқабатты үйлердің жағдайын зерттеп, бағалағаннан кейін қабылданған бұл шешім, бүгін барлық зардап шеккен отбасылармен кездесу барысында айтылды.

Аталмыш шағын аудан қала орталығына жақын орналасқан, қазір су құбыры мен электр желісінің құрылысы жүріп жатыр.

Жалпы жұмысқа 7 құрылыс компаниясы кіріседі. Жобаны іске асыру барысы мен құрылыс сапасын өзім қадағалайтын боламын. Бұл ретте ел Президенті Қасым-Жомарт Кемелұлы Тоқаев Риддердегі жағдайды жеке бақылауға алғанын ерекше атап өткім келеді.

Жалпы, өрт аймағында қалған 59 учаскедегі 31 үй толығымен өртеніп кетті. Бүгіннен бастап шығынды есептеп, тұрғындарға құжаттарды және басқа да мүліктерді қалпына келтіру мәселелері бойынша кеңес беретін комиссиялар жұмысын бастады.

"Қазмырыш" профилакторийіне көшірілгендер үй құрылысының соңына дейін осында тұрады және тегін тамақпен қамтамасыз етіледі. Бұдан қоса, кәсіпорын әрбір отбасына 1 миллион теңгеден аударатынын мәлімдеді. Осы орайда, шетте қалмайтын және қолдан келгенше көмек көрсетіп жатқан барлық қазақстандықтарға зор алғысымды білдіргім келеді. Облыс әкімдіктерінің қызметкерлері де бүгін бір күндік жалақыларын "Бірлік" қорына аударды.

Бүгін, сондай-ақ өрт кезінде зардап шеккен науқастардың дәрігерлерімен кездестім. Кәсіби көмек көрсету үшін облыс орталығынан мамандар шақырылғанын атап өткім келеді. Азаматтарымызға зор денсаулық тілеймін! Барлығы жақсы болады деп сенемін.

• 14.05.2021
• 389