С.ТРҰМОВ: «ХАЛЫҚ АЛДЫНДАҒЫ УӘДЕ ОРЫНДАЛУЫ ТИІС»

«Nur Otan» партиясы Маңғыстау облыстық филиалының кезекті ХХХІII есеп-беру сайлау конференциясы өтті.

  Іс шарада «Nur Otan» партиясы Маңғыстау облыстық Саяси кеңесінің 2019-2020 жылдары атқарған жұмыстары мен алдағы кезеңге арналған міндеттері туралы, шарада «Nur Otan» партиясы Маңғыстау облысы бойынша «Өзгерістер жолы: әр азаматқа лайықты өмір» атты сайлауалды бағдарламасын жүзеге асыруға арналған Жол картасының 2021 жылдың 1 тоқсанындағы орындалысы туралы және Бақылау-тексеру комиссиясының 2019-2020 жылдары атқарған жұмыстары мен алдағы кезеңге арналған міндеттері айтылды.

Конференцияны ашып берген облыс әкімі, партияның облыстық филиалының төрағасы С.Трұмов  партия мүшелерінің 102 бастауыш ұйымдарына топтасып Елбасы тапсырмаларын өңірде қарқынды жүзеге асырып келетінін жеткізді.
  Жиында «Nur Otan» партиясы облыстық  филиалы  төрағасының бірінші орынбасары Е.Әбіловтың  есебі тыңдалды. Оның айтуынша, есепті кезең ішінде облыстық филиалда Саяси Кеңес бюросының 22, Саяси Кеңестің 3 отырысы және 5  конференция өткен. Партия саясатын жүзеге асыратын маңызды құрылым ретінде бастауыш партия ұйымдарының жұмысын көтеруге басымдық берілді. «Ардагерлерді ардақтайық» жобасы бойынша 328 іс-шара өткізіліп, 9562 адам қамтылды. «Кедергісіз келешек» жобасы бойынша ұйымдастырылған 297 іс-шараға 7436 адам тартылды. 
  Жиында облыс әкімінің бірінші орынбасары А.Меңдібаев «Nur Otan» партиясы облыстық филиалының сайлауалды  бағдарламасы Жол картасының 2021 жылға арналған  іс-шараларының 1-тоқсанға орындалысы туралы айтып берді. «Жастарды жұмыспен және тұрғын үймен қамтамасыз ету» бағыты бойынша 46 жұмыссыз жас жұмысқа орналастырылады және 20 айлық есептік көрсеткіш көлемінде 58 340 теңге жалақы төленетін болады. 2021 жылы бір тұрғынға шаққандағы тұрғын үймен қамтамасыз ету көрсеткішін 24,2 шаршы метрге дейін жеткізу жоспарланды.   Бұл мақсатта «Нұрлы жер» бағдарламасы аясында Мұнайлы ауданы Батыр ауылында 80 пәтерлік, Түпқараған ауданы Форт-Шевченко қаласында  72 пәтерге арналған және «кредиттік тұрғын үй» бағыты бойынша 1559 пәтерге арналған тұрғын үйлердің құрылысы аяқталады.
  Ауыл тұрғындарын сапалы ауыз сумен қамту көрсеткішін 96%-ға жеткізу қарастырылған. Осы орайда, биыл жоспарланған 7 ауылда Басқұдық, Бекі, Жармыш, Ақжігіт, Рахат, Теңге, Қызылтөбеде сумен қамту нысандары салынып жатыр.   Сонымен қатар, биыл  139 шақырым автожолды жөндеу жоспарланып отыр.  Бүгінде облыстық «Ақтау – Форт-Шевченко» автожолын реконструкциялау аясында 7 км жол салынды. Қалған қалалық, аудандық және кентішілік автожолды жөндеу автожолдар бойынша жұмыстар басталуда. 
  Сондай-ақ, конференция барысында «Nur Otan» партиясы Маңғыстау облысы филиалының Саяси кеңесі құрамына өзгерістер мен толықтырулар енгізіліп, партия филиалының бақылау-тексеру комиссиясы сайланды.
Конференция жұмысын қорытындылаған облыс әкімі, «Nur Otan» партиясы облыстық филиалының төрағасы С.Трұмов халықпен бірлескен жұмысты күшейту мақсатында партия активіне нақты тапсырмалар жүктеді. 
«Халықтың ұсынымен сайлауалды бағдарламасы жасалып, жол картасы бекітілген болатын. Аталған жол картасын іске асыруға және бақылауға баршаңызды жұмыла атсалысуға шақырамын. Халық алдындағы уәде орындалуы қажет»,- деді С.Трұмов.

• 17.05.2021
• 228