Сенат 2021-2023 жылдарға арналған республикалық бюджетке түзетулерді мақұлдады

Бүгін ҚР Парламенті Сенатының жалпы отырысы барысында депутаттар «2021-2023 жылдарға арналған республикалық бюджет туралы» заңға түзетулерді мақұлдады.

«Макроэкономикалық көрсеткіштердің болжамы ел экономикасының өсуі, мұнай нарығындағы үрдістер бойынша жедел деректер ескеріле отырып, сондай-ақ әлемдік экономиканың өсуі бойынша күтулер негізінде нақтыланды», - деді ҚР Ұлттық экономика министрі Әсет Ерғалиев заң жобасын Сенатта таныстырған кезде.

Ұлттық экономика министрлігі басшысы ЖІӨ өсу қарқыны қаңтар айында минус 4,5%-тен ағымдағы жылғы сәуірдің қорытындысы бойынша плюс 0,7%-ке дейін жақсарғанын атап өтті. Мұнайдың орташа жылдық бағасы бір баррель үшін 50 АҚШ доллары деңгейінде анықталды. Ел экономикасының өсу болжамы 2,8%-тен 3,1%-ке дейін жақсарды. Номиналды ЖІӨ 77,8 трлн теңгеге бағаланады. Өңдеу өнеркәсібінде болжамды көрсеткіштер 4,1%-тен 5,2%-ке дейін, құрылыста 2,5% -тен 5%-ке дейін, ақпарат пен байланыста 3,8%-тен 6,5%-ке дейін жақсарды.

Осылайша, түзетілген макроэкономикалық көрсеткіштер негізінде 2021 жылға арналған республикалық бюджет параметрлерінің болжамы нақтыланды.

«Республикалық бюджеттің кірістері трансферттерді есепке алмағанда 2021 жылы 7 204 млрд теңгеге бағаланады, бұл бекітілген жоспардан 279 млрд теңгеге жоғары. Ұлттық қордан кепілдендірілген трансферт өзгермейді және 2 700 млрд теңге мөлшерінде сақталды. Ұлттық қордан бөлінетін нысаналы трансферт 1 триллион теңгеден 1 850 млрд теңгеге дейін ұлғайды», - деді министр.

Республикалық бюджет шығыстарына келетін болсақ, олар 15 334 млрд теңгеге болжанып отыр. Бюджет тапшылығы ЖІӨ-ге қатысты 3,5% деңгейінде болжанды.

• 20.05.2021
• 227