Облыс әкімінің Соңғы қоңырау күнімен құттықтауы

Құрметті түлектер!

Баршаңызды соңғы қоңырау мерекесімен құттықтаймын!

Бүгін сіздер үшін толқынысты сәт. Алдағы үлкен өмір – ол сіздердің келешектеріңіз. Болашаққа қадамдарыңыз Қазақстан Тәуелсіздігінің 30 жылдық мерейтойына тұспа-тұс келіп тұр. Араларыңызда қазірдің өзінде Отанымызға пайдасын тигізіп жатқандар аз емес. Еліміз көп ұзамай жаңа толқын ақтөбелік ғалымдар мен дәрігерлердің, инженерлер, музыканттар мен спортшылардың жетістіктері жайлы тың жаңалықтарды туралы естіп-білетініне сенімдімін. Өйткені, Ақтөбе өңірі – жастар үлгі тұтар тұлғалар Қазанғаптай дәулескер күйшінің, әйгілі академик-ғалымдар Құдайберген мен Ахмет Жұбановтай өнер тарландарының, Аққағаз Досжанова, Жақсылық Досқалиев, Серік Ақшолақовтай дәрігерлердің, әлемді мойындатқан Димаш Құдайбергеновтей талантты ұлдың атамекені. Әлемдік кеңістікте сіздердің тың идеяларыңыз бен жастық жігерлеріңізді қажет ететін жүздеген, мыңдаған жұмыстар бар. Бүгінгідей жаңалығы желмен жарысқан, ой-өрісі ғарышпен таласқан заманның басты әрі бірегей талабы - тынымсыз талпыныс пен үздіксіз ізденіс.

Сіздер, биылғы түлектер әлемді жайлаған індетпен күрескен қиын кезеңде табандылық пен төзім көрсетіп, білімге ерекше құштарлық танытып, осы сында биіктен көріне білдіңіздер! Осы табандылықтарыңыз өмірдегі алға қойған мақсаттарыңыз бен талаптарыңызға қосымша қуат беріп, жетістіктерге жетелейтін күш-қуат боларына еш күмән жоқ.

Біз Сіздермен мақтанамыз! Алған білімдеріңіз бен біліктеріңізді, күш-жігерлеріңізді Отанымыздың, облысымыздың өркендеп, дамуына жұмсайды деп сенемін.

Әрдайым абыройларыңыз асқақ, мерейлеріңіз үстем, жұлдыздарыңыз жарық болсын! Сәт сапар, жас түлек!

• 25.05.2021
• 57