Әсет Ерғалиев Сенат жанындағы Жас сарапшылар клубының мүшелерімен кездесті

Жас сарапшылар клубының отырысында Ұлттық экономика министрі Әсет Ерғалиев пандемия жағдайындағы Қазақстан экономикасының дамуы, сондай-ақ, дағдарыстан туындаған жаһандық трендтер туралы баяндады. Кездесу ҚР Парламенті Сенатының спикері Мәулен Әшімбаевтың төрағалығымен өткізілді.

Отырысты ашқан Сенат Төрағасы Қазақстанда азаматтарды қолдаудың ауқымды шаралары мен елдің экономикалық тұрақтылығын қамтамасыз ету шаралары қабылданғанын атап өтті. 4,5 млн-дай қазақстандық табысты жоғалту бойынша өтемақы төлемдерін алды, зейнетақылар, жәрдемақылар өтелді, медицина қызметкерлерінің жалақысы арттырылды. Мемлекет басшысының тапсырмасы бойынша бизнесті қолдау шараларының ауқымды пакеті қабылданды.

Өз кезегінде Әсет Ерғалиев пандемия «постковидтік дәуірде» әлемдік экономиканы қалыптастыратын өмірдің барлық саласындағы құрылымдық өзгерістерді тездететінін атап өтті. Трендтер қатарында – жаппай цифрландыру, серпінді инновациялардың жылдам өсуі, жаһандық сауданың бөлшектенуі, инвестициялар үшін жаһандық бәсекелестіктің күшеюі, «жасыл» экономиканың рельстеріне жедел көшу, теңсіздіктің ұлғаюы бар.

«Мемлекеттік қолдау шараларының арқасында дағдарысқа қарсы шаралардың 3 пакеті іске асырылды. Бұл халық пен бизнесті қолдау жөніндегі шұғыл шаралар, әлеуметтік-экономикалық тұрақтылықты сақтаудың жедел шаралары және Экономикалық өсуді қалпына келтірудің кешенді жоспары. Нәтижесінде, 2021 жылғы 4 айдың қорытындысы бойынша ЖІӨ өсу қарқыны өткен жылғы наурыздан бастап алғаш рет оң аймаққа шығып, 0,7%-ті құрады», - деді Ұлттық экономика министрлігі басшысы.

Сонымен қатар, 700 мың кәсіпкер 1 трлн теңге сомасындағы салық жеңілдігін, кәсіпкерлердің 40 мың жобасы жеңілдетілген кредит алды. Зардап шеккен саладағы 80%-ке жуық қарыз алушының кредиті кейінге қалдырылып, 7 млн қазақстандық төтенше жағдай және карантин кезеңінде табысынан айырылу төлемін алды.

Министрдің айтуынша, 2021 жылға арналған Экономикалық өсуді қалпына келтіру жөніндегі өзектендірілген кешенді жоспар шеңберінде 60-тан астам қолдау шарасы көзделген. Олар бизнеске жүктемені азайтуға, кәсіпкерлердің қаржыландыруға және сұраныс нарығына қол жеткізуді жеңілдетуге, сондай-ақ жаңа реттеушілік саясатты енгізуге бағытталған.

«Барлық шараларды іске асыру нәтижесінде ШОБ-та жұмыспен қамтылғандар саны 3,5 млн-нан 4 млн адамға дейін, ал ЖІӨ-дегі ШОБ үлесі 2025 жылға қарай 30%-тен 35%-ке дейін өседі. Мемлекеттің экономикадағы үлесі 14%-ке қысқарады», - деп хабарлады ұлттық экономикалық ведомство басшысы.

Инвестиция тартуға келсек, жаһандық және өңірлік өндірістік тізбектерге интеграциялану, бәсекелестік артықшылық негізінде жаңа тауашаларды іздеу, Global-2000 тізімінен өңдеу өнеркәсібі мен АӨК-ке тікелей шетелдік инвестиция мен трансұлттық компанияларды проактивтік тарту шаралары іске асырылады.

«Экономиканың сапалы өсімі салық-бюджет тұрақтылығын және тиімді монетарлық саясатты сақтау, сондай-ақ қаржы нарығын дамыту есебінен қолдау табады. Бүгінгі таңда коронавирус пандемиясынан туындаған өзгерістер қазақстандық экономиканы үдемелі құрылымдық трансформациялауға мүмкіндік береді», - деді министр.

Кездесуді қорытындылай келе, Әсет Ерғалиев сарапшыларға сындарлы ұсыныстары үшін алғыс білдіріп, оларды егжей-тегжейлі талқылауға және одан әрі жұмыста ескеруге дайын екенін жеткізді.

• 26.05.2021
• 206