Ақтөбе облысының Қобда ауданында жаңа мұражай салынады

Қобда ауданының орталығы - Қобда ауылында жаңа мұражай салынып жатыр. 27 мамыр, бейсенбі күні аталмыш ауданға жұмыс сапарымен барған облыс әкімі Оңдасын Оразалин нысанның құрылыс барысымен танысты. Жергілікті бюджеттен қаржыландырылатын жоба құны 72 млн теңгені құрайды. Жаңа мұражайда өлкенің бай тарихын баяндайтын бағалы жәдігерлер, тарихи артефакттар жинақталады.

Өңір басшысы жұмыс сапары аясында әлеуметтік-мәдени саланың тағы бірнеше нысанын аралады.Атап айтқанда, Оңдасын Оразалин Қобда ауылындағы ғимараттың жөндеу жұмыстары мен мәдениет үйі маңайының абаттандырылуын қарап шықты. Бұл мақсатқа жергілікті бюджеттен 39,6 млн. теңге бөлінген. Жұмысты биыл шілде айында аяқтау жоспарланып отыр. Сондай-ақ, облыс әкімі Талдысай ауылындағы клубтың жұмысымен танысты. Клуб жалпы аумағы шамамен 1300 м2 болатын екіқабатты ғимаратта орналасқан.

Мұнда ауыл тұрғындары үшін би, вокал, домбыра үйірмелері мен кітапхана және т.б. қол жетімді.

• 28.05.2021
• 51