САЯСИ ҚУҒЫН-СҮРГІН ҚҰРБАНДАРЫН ЕСКЕ АЛУ КҮНІНЕ ОРАЙ ШАРА ӨТТІ

Ақтауда саяси қуғын –сүргін заманының тарихта өшпес аты алған қазақтың алаш айбындыларының рухына тағзым етіліп гүл шоқтары қойылды. 

Зұлмат жылдардың құрбаны болғандардың рухына тағзым ету мақсатында бір топ зиялы қауым өкілі Жалау Мыңбаев пен Тобанияз Әлниязұлының ескерткішіне жиналды. Олар 1 минут үнсіздік сақтап, өткен ғасырдағы ең қилы кезеңнің бірінде жазықсыз жапа шеккендерді еске алды. 

Сондай-ақ, Әбіш Кекілбайұлы атындағы тарихи-өлкетану музейінде қуғын-сүргін құрбандарын еске алуға арналған  «Зұлмат жылдар жаңғырығы» атты көрме  ұйымдастырылды. Бұдан бөлек, көрме залында Нұрмұхан Жантөрин атындағы музыкалық-драма театры актерларының қатысуымен «Әлиханның аманаты» атты пьесасынан үзінді сахналанды.

Шара барысында саяси қуғын-сүргін құрбандарын ақтау жөнінде өңірлік комиссияның қызметі туралы ақпарат берілді. Сонымен қатар, қуғын-сүргін құрбандарын ақтау жұмыстарына гранттар бөлу бойынша ұсыныстар айтылды.

«Өңірлік архив қорынан репрессияға байланысты 11 қор таңдалып, тізімі жасақталды. Бұл архив құжаттарының барлығы төте жазуымен жазылған. Осыған байланысты мамандар тартылуда. Маңғыстау облысы полиция департаментіне тұтқындарға қатысты мәліметтердің толық тізімін сұрату бойынша хат жолданып, тұтқындардың 604 тізімі мен қуғын-сүргінге ұшырағандардың 478 тізімі электронды түрде алынып, зерделеу жұмыстары жүргізілуде», - деді Маңғыстау облысы мәдениет, тілдерді дамыту және архив ісі басқармасының басшысы Пәния Сармурзина.

• 31.05.2021
• 174