АҚТАУДА ҮШІНШІ МУРАЛ САЛЫНЫП БІТТІ

Бүгін облыс әкімі С.Трұмов көп қабатты тұрғынүйлердің қабырғаларына ел мақтаныштарының ірі көлемдегі муралдарын салып жатқан мамандармен кездесіп, жұмыстарымен танысты. 
  Алматы қаласынан арнайы шақыртылған суретшілер алдымен халық жазушысы Әбіш Кекілбаевтың суретін сомдаса,  екінші үйге Есенғали Раушановтың бейнесін салды. Күні кеше ақын Фариза Оңғарсынованың муралы аяқталды. Мамандардың айтуынша, әр суретті бейнелеуге 4-5 күн кетеді екен.
 «Мұндай ірі көлемдегі портреттерді алғаш рет салып отырмыз. Сондықтан да бұл жұмыс оңай болмады. Бірінші күні муралдың жобасын сызып аламыз. Ол түнгі мезгілде жасалады. Сосын 3-4 күн бояймыз. Ұлы тұлғалардың өмірден өткеніне көп уақыт болған жоқ. Бейнелері халық жадында жақсы сақталған. Барынша түп нұсқасына ұқсатып салуға тырыстық. Бастысы суретті көрген тұрғындар  бұл адамдардың кім екенін ұмытпай, шығармашылығын біліп жүрсе екен»- дейді Ержан Танаев. 
Аталған жұмыстар ел Тәуелсіздігінің 30 жылдығына орай облыс әкімдігінің «Ел игілігі үшін» жобасы аясында  жүзеге асып жатыр. Аймақ басшысы қаламызға сән беріп, ұрпаққа ой салатын мұндай туындыларды жүзеге асырып жатқан мамандарға алғысын жеткізді.   

• 07.06.2021
• 181