МАҢҒЫСТАУДА ЖАНУАРЛАР АРАСЫНДА ЖҰҚПАЛЫ АУРУЛАР ТІРКЕЛГЕН ЖОҚ

Маңғыстау облысында жануарлар арасында аса қауіпті аурулар тіркелген жоқ. Бұл туралы Маңғыстау облысы қоғамдық коммуникация орталығында өткен брифингте МО Ветеринария басқармасының басшысы Шамғали Хамиев мәлім етті.

Оның айтуынша қауіпті аурудың таралуына жол бермеу мақсатында төрт түлікке салынатын дәрілер мемлекеттік бюджет есебінен сатып алынады. Әр аумақтағы эпизоотиялық жағдайға байланысты, жануарларды вакцинациялау ақысыз негізде жүргізіледі.

«Құтыру ауруына қарсы ірілі-ұсақты мал, жылқы, түйе, ит, мысыққа екпе салу қыркүйек-қазан айында жүргізіледі.  Пастереллез ауруына қарсы ұсақ мал сәуір және мамыр айында егіледі. Сібір жарасына қарсы түйе, ірі қара малды егу жұмысы сәуір-мамыр, қыркүйек-қазан айында өтеді.  Эхинококкоз ауруына қарсы вакцинациялау наурыз, маусым, қыркүйек, қараша айында жүргізіледі. Күл ауруына қарсы ұсақ мал сәуір, маусым, тамыз-қараша айында егіледі. Оба ауруына қарсы мамыр және шілде айында түйеге екпе салынады. Маңқаға тексеру сәуір,тамыз, қараша айында жүргізіледі. Вакцинациялау жұмыстарымен қатар диагностикалық ветеринариялық іс-шаралар тегін жүргізіледі»,-деді Шамғали Хамиев.

Мамандардың айтуынша заңға сәйкес төрт түлік иелері қой-ешкіні, сиыр мен түйені сырғалауға, жылқыны чиптеуге міндетті. Сырғаланған және чиптелген мал тиісті жеке нөмірімен ауыл шаруашылығы жануарларын бірдейлендірудің электронды базасына енгізіледі. Төрт-түлік базаға тіркелмеген жағдайда ауылдық округтің ветеринар маманына немесе аудандық ветеринариялық станцияға хабарласуларыңыз сұралады.

• 18.06.2021
• 199