Құрметті облыс тұрғындары!

Бүгін Күршім ауданында Бұқтырма су қоймасы арқылы өтетін автомобиль көпірінің құрылысы ресми түрде басталды. Бұл қуанышты жаңалықты өздеріңізбен бөліскенді жөн көрдім.
⠀
Екі жолақты автомобиль көпірі Құйған ауылының жанындағы жасанды су қоймасының ені ең жіңішке учаскесінде салынады. Көпірдің ұзындығы 1,3 шақырымнан асады. Жоба Күршім мен Көкпекті аудандарын жалғайды. Мердігер компания «ОблШығысЖол» ЖШС құрылысты 2024 жылға дейін аяқтауы тиіс.
⠀
Бұл облыс тұрғындары үшін көптен күткен өте маңызды оқиға. Президенттің тапсырмасына сәйкес жүзеге асырылып жатқан жоба стратегиялық маңызға ие. Ол шекаралас аудандарды облыстың басқа өңірлерімен байланыстырады, жолаушылар мен жүк тасымалы жеңілдейді әрі жылдам болады. Көпір шалғайдағы елді мекен тұрғындарының өмір сүру сапасын жақсартуға ықпал етеді және облыс экономикасын одан әрі дамытуға жаңа мүмкіндіктер ашады.

• 18.06.2021
• 340