Қадірлі бұқаралық ақпарат құралдарының қызметкерлері! Құрметті сала ардагерлері!

Сіздерді бүгінгі кәсіби мерекелеріңіз – Бұқаралық ақпарат құралдары қызметкерлері күнімен шын жүректен құттықтаймын!
Журналист болу – халыққа қызмет ету. Сондықтан да журналистика саласына артылар міндет пен жүк жеңіл емес.
Осыдан бір ғасырға жуық уақыт бұрын ұлт ұстазы Ахмет Байтұрсынұлы «Газет – халықтың көзі, құлағы һәм тілі» деп баға берген еді. Сіздердің жазған әрбір мақалаларыңызда, дайындаған сюжеттеріңізде елдің мұңы мен мұқтажы, ойы мен пікірі, талабы мен тілегі, қоғам дамуының тынысы, еліміздің жеткен жетістігі айқын көрініс тауып отыр. Осылайша, жұмыс барысында жұртпен етене араласып, «Халық үніне құлақ асатын мемлекет» қағидатын жүзеге асыруға зор еңбек сіңіріп келесіздір.
Бүгінде ақпарат айдынында еңбек етіп жүрген тілшілер қауымы заман көшінен қалмай, жаңа медианы меңгеріп, елдікті сақтау, азаттықты баянды ету жолында абыройлы қызмет атқарып жүр. Мемлекетімізде баспасөз бен тележурналистика, ақпараттық сайттар заман талабына сай түрленіп, қоғамға қажетті маңызды ақпараттарды уақытылы таратып келеді. Елді игі іске жұмылдырып, берекені арттырып, татулықты нығайтуда билік пен халық арасында алтын көпір болып жүрген бұқаралық ақпарат құралдарының рөлі қашанда жоғары.
Маңғыстау өңірінің бұқаралық ақпарат құралдары әрдайым жоғары жауапкершілік және кәсіпқойлықпен ерекшеленеді. Пандемия басталғалы дәрігерлер, полицейлермен қатар журналистер де алғы шепте жүріп, қауіпті індетпен күресуге күш салды. Халыққа шынайы, сенімді, толыққанды ақпарат жеткізу үшін оқиға ортасына барған да, мамандардан арнайы сұхбат жазған да өздеріңіз. Еселі еңбектеріңіз үшін зор алғысымды білдіремін!
Сіздерге мықты денсаулық, отбасыларыңызға амандық, шығармашылық табыс пен шалқар шабыт тілеймін. Еткен еңбек пен төккен тер Тәуелсіздікті тұғырлы етуге жұмсала берсін. Қасиетті қаламның құдіреті шығармашылықтың шыңына көтеріп, абырой-беделдің биігіне асқақтатсын. Мереке құтты болсын!
 
Құрметпен, Маңғыстау облысының әкімі С.Трұмов

• 29.06.2021
• 153