Қарағандылық мұғалімдер Астана күніне орай сыйлық алды

Елорда күні қарсаңында Елбасының тапсырмасы бойынша қаламыздың жас тұрғындарына арнап салынған балалар мен жасөспірімдер сарайында болдым. Бұл Тәуелсіздіктің мерейтойлық жылында жас өрендерімізге жасаған тартуымыз. Мұнда балалардың дамуы үшін барлық жағдайлар жасалған. Сабақтарды қыркүйек айында бастау жоспарлануда.

Сондай-ақ, Қарағандының жиырма төрт мұғаліміне пәтер кілттерін табыс еттік. Жалпы алғанда, биыл денсаулық сақтау, білім беру, мәдениет саласының қызметкерлеріне жүзден астам ведомстволық пәтер беріледі. Бюджет қызметкерлерінің тұрғын үй мәселесін шешу жұмыстары одан әрі жалғасатын болады.Бұл үшін бізде барлық мүмкіндіктер бар. Осы жылы облыста тұрғын үй құрылысы төрттен біріне ұлғайтылды.

Сондай-ақ жол құрылысы жұмыстарының барысын тексердім. Терешкова көшесінің қиылысындағы жол учаскесінде топырақ қабатын тұрақтандыру бойынша жұмыстар жүргізіліп,су құбырлары салынды. Қажетті жұмыстар жасалған соң, шілде айының ортасына дейін асфальттің 3 қабаты төселеді.

К. Маркс-Магнитогорская көшесі бойында инженерлік коммуникацияларды нығайту бойынша жұмыстар жүргізілуде. Сонымен қатар нөсер кәрізін монтаждау, топырақты тұрақтандыру шаралары іске асырылуда.

Ал Сталелитейная көшесінен Күзембаев көшесіне дейінгі учаскеде асфальттың үстіңгі қабатын төсеу жұмыстары жүргізілуде.

Спорттық мекемелерге де бардым. Н. Әбдіров атындағы спорт сарайында жоғары спорт шеберлігі мектебіндегі жаттығу процесімен таныстым. Мұнда Қарағанды облысының барлық жетекші спортшылары жаттығады.

Ә. Молдағұлова атындағы облыстық спортқа дарынды балаларға арналған мамандандырылған мектеп-интернатында оқу және тұру үшін жасалған жағдайлармен таныстым. Мұнда 7 сыныптан бастап, 11 сыныпқа дейін 500-ден астам бала оқиды және 18 спорт түрінің қыр-сырын меңгеруде. Оқуды аяқтаған соң тәрбиеленушілер осы жерде интернат жанында жұмыс істейтін колледжде арнайы орта білім ала алады.

Сонымен қатар, бұрын жазғанымдай биыл облыстық онкологиялық аурухананың жаңа операциялық-реанимациялық блогының құрылысы басталды. Жобаны келесі жылы аяқтау жоспарлануда.

• 04.07.2021
• 218