Ақтөбе облысында жылыту маусымына дайындық жоспарлы түрде жүріп жатыр

Өңір басшысы Оңдасын Оразалиннің төрағалығымен өткен жиында облыстың тұрғын үй-коммуналдық шаруашылығы мен отын-энергетикалық кешеннің алдағы жылыту маусымына дайындығы талқыланды.

Жылыту маусымы басталғанға дейін облыс бойынша 630 қазандық, 268 шақырым жылу, 61 шақырым су құбыры – кәріз, 148 электр желілері жөнделу керек. Облыс әкімінің орынбасары Сәлімгерей Бекбергенов: жөндеу жұмыстарының кестесі сақталып отыр,- деп баяндады. Облыс әкімі жылыту кезеңіне дайындық барысын, соның ішінде көмір бағасын баса назарда ұстауды тапсырды.

О.Оразалин: «Бағаны бақылап, негізсіз үстеме бағаға жол бермеу керек. Арадағы алыпсатарлар толығымен алынып тасталуы қажет,- деген міндет қойды.

Көмір облыс халқына тамыз айында беріле бастайды. Жиын суармалы жерлерді пайдалану сұрақтарын қараумен жалғасты. Атап өтейік, қазіргі таңда өңірде 10,6 мың гектардан астам суармалы жерді қалпына келтіру жұмыстары жүргізілуде, оның 4,6 мың гектары биыл пайдалануға берілмек. Облыс әкімі пайдалануға беріліген және мұның алдында берілген суармалы жерлерді толық игеретін түбегейлі шараларды қабылдауды талап етті. Бұдан өзге, жалпы ауыл шаруашылығына арналған жерлердің оңтайлы пайдаланылуын қадағалауды күшейтуді тапсырылды.

• 13.07.2021
• 284