Бүгін Көкшетауда ел Тәуелсіздігінің 30 жылдығы аясында ТМД-дағы ең ірі және солтүстік өңірдегі John Deer маркалы ауыл шаруашылығы техникасының толық желісіне қызмет көрсететін жалғыз сервис орталығының ашылуы өтті.

Сервис орталығын швейцария компаниясының «Eurasia Group AG» өкілі - John Deere Ұлттық дилері «Евразия Групп Казахстан» ЖШС ашты.

John Deer комбайндары мен тракторлары бүкіл әлемдегі аграршылар арасында жоғары өнімді және сенімді техника ретінде сұранысқа ие. Бүгінгі таңда Ақмола облысы бойынша John Deere маркалы ауыл шаруашылығы техникасы паркі 428 тракторды, 590 комбайнды және 370-ке жуық егіс кешенін құрайды.

Заманауи жаңа сервистік орталық ауыл шаруашылығы саласының қазіргі заманғы сұраныстары мен үрдістеріне жауап беретін болады: Қазақстан бойынша қосалқы бөлшектердің болуын және үздіксіз жеткізілуін қамтамасыз етеді, техниканы күрделі жөндеу және қалпына келтіру мүмкіндіктерін кеңейтіп, іске қосу мүмкіндігін кеңейтеді, фермерлер мен жас мамандарды ауыл шаруашылығындағы жаңа технологияларға оқытуға мүмкіндік береді.

Нысанның ашылу салтанатына Германияның Қазақстандағы Төтенше және Өкілетті Елшісі Тило Клиннер және ҚР Ауыл шаруашылығы бірінші вице - министрі Айдарбек Сапаров қатысты.

Іс-шараның қонақтары мен қатысушыларын облыс әкімі Ермек Маржықпаев қарсы алды.

«Шетелдік инвестордың қатысуымен индустриялық-инновациялық дамудың мемлекеттік бағдарламасы аясында іске асырылған «Евразия Групп Казахстан» ЖШС жобасы еліміз Тәуелсіздігінің 30 жылдығы қарсаңында ашылатын өңір үшін ең маңызды жобалардың бірі болып табылады. Сервис орталығының құрылысы үшін біздің облыс орталығы таңдалғаны бекер емес. Логистика тұрғысынан Көкшетау қаласы еліміздің солтүстік өңірінің ірі қалаларына тең, сондай-ақ астанаға жақын орналасқан. Жаңа нысан аграрлық сектордың дамуына серпін береді», - деді аймақ басшысы өз сөзінде.

Айта кетейік, жобаның жалпы құны 2,6 млрд.теңгені құрап, 130 жұмыс орны ашылды.

• 23.07.2021
• 282