Жаңаөзендік хирург Мақсат Оңайбаев - алтын қолды дәрігер

Дәрігерлік - жауапты мамандық. Бұл кәсіпті таңдаған маманға үлкен жауапкершілік жүктеледі. 

Мақсат Оңайбаев дәрігер мамандығының маңыздылығын түсініп, бала кездегі арманын жүзеге асырып, ұзақ жылдар бойы дәрігер болып қызмет етіп келе жатқан әкесі Жаңабай Жәңгірұлының еңбек жолын жалғастырғысы келді. 

Осылай арман қуған Мақсат Оңайбаев 2004 жылы Марат Оспанов атындағы Батыс Қазақстан мемлекеттік университетінің педиатрия факультетіне түсіп, оны 2011 жылы балалар хирургі мамандығы бойынша тәмамдайды. Ол еңбек жолын № 2 Жаңаөзен қалалық емханасында балалар хирургі болып бастады. Ал, 2012 жылдан қазіргі таңға дейін Жаңаөзен қалалық көпбейінді ауруханасының хирург маманы қызметінде. 

Жас хирург өз саласы бойынша үнемі біліктілігін жетілдіре отырып, күрделі оталарды жасап, кішкентай науқастардың өміріне араша түсіп келеді. Мақсат Жаңабайұлы 2015 жылы Алматы қаласында қан тамыр хирургиясы бойынша біліктілігін арттырды. Оны әріптестері жас болса да сауатты, кәсіби шеберлігі жоғары маман ретінде бағалайды. 

Күллі әлемді шарпыған коронавирус індетімен Мақсат Оңайбаев әріптестерімен бірге алдыңғы шепте жүріп күресуде. Күні-түні науқастардың дерттен айығып, отбасыларына оралуы үшін қажырлы еңбек етіп келеді. 

«Жалпы, хирург болу өте қиын. Адамның қанын көру, онымен жұмыс жасау кез-келген адамның қолынан келе бермейді. Үлкен жауапкершілікті талап етеді. Адам өміріне жауапты боласыз. Ота жасамас бұрын қалай болар екен деп ойланып шықсақ, отадан кейін де түнімен ұйықтай алмайтын кездеріміз болады. Науқасқа дәрісін беріп, уколын салып кететін басқа салаларға қарағанда, хирургия саласының салмағы ауыр», - дейді хирург дәрігер Мақсат Жаңабайұлы. 

Пышақ үстінде жатқан науқастың үмітін өшірмей, оны өмір сүруге талпындыру, сендіру қаншалықты ауыр болса, ота жасайтын дәрігерге артылар жауапкершілік жүгінің салмағы да соншалықты зіл батпан. 

Мақсат Оңайбаевтың пайымдауынша,  хирургке сақтық, ұқыптылық және шыдамдылық аса қажет. Өйткені, кез-келген отаны жасау - өте күрделі процесс. Міне, осындай қиыншылығы мол, құрметі мен жауапкершілігі тепе-тең түсетін қызметті абыроймен атқару оңай шаруа емес. 

Пинцент, қайшы, ілгек, тебен... Бірінен соң бірі хирургтардың қолында ойнайтын құралдар. 

Бүгінде біздің кейіпкеріміз Мақсат Жаңабайұлы әке жолын қуған білікті хирург, үш баланың әкесі. Ол халықтың сый-құрметіне бөленіп, алғыс арқалаған ақ халатты абзал жан. 

Маңғыстау облысы әкімінің баспасөз қызметі

• 06.08.2021
• 218