АҚТАУДА ОЗЫҚ ҮЛГІДЕГІ СУДА ҚҰТҚАРУ СТАНЦИЯСЫ АШЫЛДЫ

Жаңа нысан Маңғыстау облысындағы барлық суда құтқару бөлімшелерінің орталығы ретінде жұмыс істейтін болады. 
  
Каспий жағалауында орналасқан жаңа суда құтқару станциясының ашылу салтанатына Маңғыстау облысының әкімі С.Трұмов пен ҚР төтенше жағдайлар министрінің 1-ші орынбасары И. Күлшімбаев қатысты.  
  
Облыс әкімі С.Трұмов жиналғандарды жаңа нысанның ашылуымен құттықтап, құтқару қызметінің жұмысын жетілдірудің маңыздылығын атап өтті.
  
«Көптен күткен суда құтқару станциясын салу қажеттілігі жағалау аймағында болып жатқан төтенше жағдайларға тұрақты әзірлікті және жедел ден қоюды қамтамасыз ету мақсатында туындады. Теңіз жағалауындағы демалыс орындары да, өңірге келіп, жағажайда демалушылардың да саны жылдан-жылға артып келеді. Олардың қауіпсіздігін қамтамасыз етуде бұл орталықтың маңызы зор болмақ. Құтқарушылардың алаңсыз қызмет етуіне мұнда барлық жағдай жасалған»,-деді облыс басшысы. 
   
Станция жылдам жүретін құтқару катерлерімен, сүңгуір және суда құтқару жабдықтарымен, автокөліктермен және жүзу құралдарымен жабдықталған. 
  
«Бұл станцияның ашылуын көптен күттік. Осыған дейін тар бөлмеде отырсақ, енді заман талабына сай, ішінде құтқарушылар үшін барлық жағдай жасалған ғимаратқа қоныс аудардық»,-дейді Жедел-құтқару жасағының басшысы Назар Ізтілеуов. 
  
Биыл суға түсу маусымы басталғалы өңірде 9 адам суға кеткен. 

Маңғыстау облысы әкімінің баспасөз қызметі

• 06.08.2021
• 219