Оңдасын Оразалин: Абай - қазақтың бойтұмарына айналған ақын

Сейсенбі, 10 тамыз күні Ақтөбе облысының әкімі Оңдасын Оразалин қазақтың ұлы ақыны Абай Құнанбайұлының туған күніне орай ескерткішіне тағзым етіп, гүлшоғын қойды.
Игі шараға облыс әкімінің орынбасары, облыстық мәслихат хатшысы және ардагерлер қатысты.
Аймақ басшысы ұлы ақынның қазақ халқы үшін орны бөлек тұлға, өскелең ұрпақ үшін зор мақтаныш екенін атап өтті.
- Абайдың өлеңдері мен қара сөздерінде ұлт болмысы, бітімі, тұрмысы, тіршілігі, дүниетанымы, рухы көрініс тауып келеді. Жалпы қазақ халқы үшін бұл үлкен атаулы мереке. Әлемге танымал бас ақынымыздың еңбегін халық болып ұлықтау мемлекетіміздің мерейін арттырады. Ол үшін бүгінгі буын Абай мұрасынан нәр алып, рухани кемелденуі қажет. Бабамыздың еңселі ескерткіші сүйікті қаламыздың көркіне көрік қосып, аға буын мен жас ұрпақтың бас қосатын орталығына айналды. Бұл - Абайдың сөзі мен ісін бейнелейтін ақынның тектілігін танытатын керемет туынды. Ұлы ойшылдың асыл мұрасын ардақтау және жан-жақты дәріптеу баршамыздың міндетіміз, - деді облыс әкімі.

• 10.08.2021
• 222