Облыс әкімі колледждерді профильдеу жұмыстарын жеделдетуді тапсырды

Ақтөбе облысының әкімі Оңдасын Оразалин білім басқармасына колледждерді профильдеу жұмыстарын жеделдетуді тапсырды. Тапсырма Ақтөбе жоғары ауыл шаруашылығы колледжі мен "Еуропалық экономика, бизнес және құқық жоғарғы колледжіне"​ барған кезде берілді.
«Жұмысшы мамандарды даярлау – қазіргі таңда өзекті мәселе. Білікті жұмысшыларға деген сұраныс ауыл шаруашылығымен қатар, өнеркәсіп өндірісінде де жоғары. Қай жерге барсаң да агроном, мал дәрігері, механизаторлар керек. Колледждердегі кәсіби даярлық деңгейін көтеру қажет. Соның ішінде оқу орындарын профильдеген жөн. Ауыл шаруашылығы колледжінде дене шынықтыру пәні мұғалімін не үшін дайындайды? Колледж мамандығы тар шеңберлі болуы керек. Бұл барлық оқу орындарына қатысты. Облыстағы барлық колледжді сараптап, мамандандырыңыздар»,- деді өңір басшысы.
Ақтөбе жоғары ауыл шаруашылығы колледжінің негізі 1977 қаланған. Елбасы Нұрсұлтан Назарбаевтың тапсырмасына сәйкес өткен жылы іске қосылған «Жас Маман» жобасы аясында колледж 37 бірлік заманауи ауыл шаруашылығы техникасымен жабдықталған. Колледж директорының міндетін атқарушы Айгүл Балмағамбетованың айтуынша, бұл дуалды оқыту жүйесінің элементтерін енгізуде үлкен демеу болған. «Жас​ маман» бағдарламасы аясында өңірдегі барлығы бес колледждің материалдық-техникалық базасы нығайтылды.
Еуропалық экономика, бизнес және құқық жоғарғы колледжі бір жыл бұрын ашылған. Студенттердің арасында Ресей, Әзірбайжан, Конго, Нигерия және өзге де елдерден келген жиырмаға жуық шетелдік бар. Академиялық мобильділік аясында студенттерін Франция, Италия, Украина, Белорусь, Польша елдерінің оқу орындарымен бір семестрге алмастырады.

• 24.08.2021
• 247