МАҢҒЫСТАУДЫҢ ЗИЯЛЫ ҚАУЫМЫ САҚЫП КЕРЕЛБАЕВТЫ ЕСКЕ АЛДЫ

Еске алу шарасына облыс әкімі С.Трұмов, облыслық ардагерлер кеңесінің мүшелері, С.Керелбаевпен қырық жылға жуық мемлекеттік және қоғамдық қызметтерде үзеңгілес серік болған еңбек ардагерлері, Керелбаевтар әулеті мен марқұмның отбасы қатысты. 
  Салтанатты шараны ашып берген облыс басшысы С.Трұмов  өмірі өнегелі іске,  сөзі –  ғибратқа толы тұлғаның өмір жолынан тың естеліктер айтып, тұлғаның есімі ешқашан ұмытылмайтынын жеткізді.
  «Сақып Бүркітбайұлы Маңғыстау топырағында дүниеге келіп, өмірінің соңына дейін кіндік қаны тамған жерінің дамуына өлшеусіз үлес қосқан арда азамат еді. Тәуелсіз Қазақстанның қалыптасуы мен дамуы жолында аянбай тер төкті. Елдің тізгінін ұстап, елге, қоғамға абыройлы қызмет қылды. Өзінің 45 жыл қызметбаянында игі істердің мұрындығы болды. Ол кешкен ғұмыр, ол өткен еңбек жолы – өлке тарихының жарты ғасырлық жылнамасындай. Артына өшпес  іс пен өлмес сөз қалдырған Сақып Бүркітбайұлының есімі ұмылытмақ емес. Оның жарқын бейнесі мәңгі жадымызда қалады.»,-деді С.Трұмов. 
  Аталмыш шарада Сақып Бүркітбайұлының қазасына орай ҚР Мемлекеттік хатшысы Қырымбек Көшербаевтан келіп түскен  көңіл айту хаты оқылды. Сондай-ақ, мемлекет және қоғам қайраткері Лаззат Қиыновтың, Қазақстанның еңбек сіңірген қайраткері Ғани Кариннің, ғалым, мемлекет және қоғам қайраткері Өмірзақ Озғанбаевтың, ҚР Парламенті Мәжілісінің депутаты Гүлнәр Сейтмағанбетованың арнайы жолдаған көңіл айту бейнежазбалары көрсетілді.

• 26.08.2021
• 293