АҚТАУДАҒЫ ЖАҢА МЕКТЕПТІҢ АШЫЛУЫНА 95 ЖАСТАҒЫ АРДАГЕР ҰСТАЗ ҚАТЫСТЫ

Ақтауда Ел Тәуелсіздігінің 30 жылдығына орай жаңа мектеп пайдалануға берілді. 

«Шығыс» ықшам ауданы тұрғындары асыға күткен №25 жалпы білім беру мектебі жаңа оқу жылын 600 оқушымен бастады. 
Білім ордасында физика, химия, информатика кабинеттері, мултимедиялық және лингафондық кабинеттер соңғы үлгідегі технологиялармен жабдықталып, мектеп оқушыларының сапалы білім алуына барлық жағдайлар жасалған.

Салтанатты шарада алғаш сөз кезегі қала әкімі Нұрдәулет Игілікұлына беріліп, кісіліктен кішілікті, іріліктен ізгілікті жоғары қойған қала басшысы алғашқы сөзді КСРО және Қазақ КСР-і оқу-ағарту ісінің озаты, қаланың даму тарихында өзіндік қолтаңбасы бар
95 жастағы ардагер ұстаз Ыдырысова Салиха Қаженқызына ұсынды. 

Саналы ғұмырын жас ұрпаққа білім беруге арнаған тау тұлға: «Ұстаздың еңбегі инемен құдық қазғандай. Ұстаздың қолында еліміздің болашағы, біздің еліміз қандай болатындығы, осы жастардың қолында»,-деп мектеп табалдырығын алғаш аттаған бүлдіршіндерге ақ батасын берді.  

Алғашқы қоңырау шарасында Салиха Қаженқызы мен қала әкімі Нұрдаулет Қилыбай 1 сынып оқушыларына «Әліппе» оқулығын табыстады. 
Ақтау қаласы ардагерлер кеңесінің төрағасы Қартбай Аманжол мен ұлғатты ұстаз жаңа мектептің лентасын қиып, оқу кабинеттерін аралап көрді. 

Жаңа білім ордасында еңбекке баулу пәні үшін 4 кабинет арналған. Қыздарға арналған ас үй және тігін машиналары бар, ал, ұлдар үшін ағаш станоктары мен саз балшықтан түрлі бұйымдар жасауға арналған жаңа техникалар орнатылған. Бұл - саз балшықтан бұйымдар жасауға арналған құрылғысы бар Ақтаудағы алғашқы мектеп. 

Ақтау қаласы әкімінің баспасөз қызметі

• 01.09.2021
• 296