Өскеменде жол-көлік инфрақұрылымын дамытудың бірінші кезеңі аяқталуда.

Өскеменде жол-көлік инфрақұрылымын дамытудың бірінші кезеңі аяқталуда. Төрт жыл бұрын бірқатар шешімдер қабылдағанбыз, сол кезде ойға алған жоспарларымыздың барлығын орындадық.

Қазір Алматы тасжолына шығатын І.Есенберлин көшесінің құрылысын аяқтап қалдық. Самар күрежолына бағыт алатын Қ.Сәтпаев көшесінің құрылысы бітті.  Понтон көпірінен Меновное ауылына дейінгі жолды жөндеу біршама созылып кетті, есесіне біз аталмыш елді мекеннің ішіндегі жүру бөлігін кеңейттік. Сондай-ақ, Республикалық маңызы бар Өскемен - Алматы автожолына шығатын жолдың құрлысын тәмәмдадық.

Келесі кезеңде Алматы және Семей бағытына шығатын жолдарды және облыс орталығының бірнеше көшелеріндегі көлік жүретін жол тағандарын кеңейтеміз, Астана көшесін жалғастырамыз.

Инвесторлар қалаға қызығушылық танытып, ауқымды жобаларды жүзеге асыру үшін өз қаражатын салуға құлшыныс білдіргені қуантады.

2022 жылы Семейдің көшелерін күрделі қайта жаңарту қарастырылған, қала ішіндегі жолдардың 50 шақырымы жөнделетін болады. Айналма жолдың құрылысына үлкен мән береміз.

Жұртшылық үшін тағы бір маңызды жоба Шемонаихадағы көпірді қайта жаңарту. Қазір бұл өткелден өту кезінде қиындықтар бар. Көпір жаңартылғанда аталмыш мәселе толық шешімін табады. Бұл реконструкциялау жобасы айрықша маңызы бар Алматы-Өскемен-РФ шекарасына шығатын транзиттік бағыттың бір бөлігі.

Осылайша, Шығыс Қазақстан облысының ірі қалаларында және басқа да елді мекендерінде халықтың өмір сүру сапасын жақсарту үшін жол инфрақұрылымын дамыту бойынша ауқымды жұмыс жүргізудеміз.

• 09.09.2021
• 347