Маңғыстау облысының ардагерлері Нұрлан Ноғаевқа өңірдің өзекті мәселелерін жеткізді

Бүгін, 9 қыркүйекте Маңғыстау облысының әкімі Нұрлан Ноғаев өңір ардагерлерімен кездесті. Кездесу барысында Президенттің жаңа Жолдауында қойылған міндеттерді жүзеге асыру жолдары талқыланды, деп хабарлайды Маңғыстау облысы әкімінің баспасөз қызметі.
Кездесуге ұзақ жылдар бойы қажырлы еңбек етіп, еліміздің тәуелсіздік алуына өз үлесін қосқан түрлі қызмет саласының ардагерлері жиналды. Өз сөзінде Нұрлан Ноғаев жергілікті атқарушы органдардың басым міндеттерінің бірі Covid-19 пандемиясы кезеңінде экономикалық жағдайды жақсарту болып табылатынын атап өтті.
- Мемлекет басшысының Жолдауында Маңғыстау өңірінің әлеуметтік-экономикалық жағдайын жақсартуға тікелей байланысты нақты міндеттер қойылған. "Астрахань-Маңғыстау" магистралды су құбырын жаңғырту және Кендірлі тұщыландыру зауытын салу бойынша нақты тапсырмалар берілді, - деді Нұрлан Ноғаев.
Өз кезегінде облыс ардагерлері әкімге өңірдің жайылымдық жерлерді суландыру, жем-шөп қорын құру, халықты ауыз сумен қамтамасыз ету сияқты өзекті мәселелерін шешу туралы өз ойларын айтты. Нұрлан Ноғаев Президент тапсырмаларын орындау жергілікті атқарушы органдардың тұрақты бақылауында болатынын атап өтті.
 
Облыс әкімі ардагерлерге айтылған ұсыныстар үшін алғыс айтты. Кездесу қорытындысы бойынша жауапты тұлғаларға бірқатар нақты тапсырмалар берілді.

Маңғыстау облысы әкімінің баспасөз қызметі

• 14.09.2021
• 207