«Парасатты полицей» республикалық байқауы ұйымдастырылды

Қазақстан халқы тілдері күніне орай Ішкі істер органдарында дәстүрлі «Парасатты полицей» республикалық байқауы ұйымдастырылды.

Бұл байқау осымен 11 жыл қатарынан өткізіліп отыр. Жыл сайын әр аймақтың полиция департаменттері сахналық қойылымдар көрсетіп, сайысқа түседі. Өнерлі, білгір, дарынды қызметкерлер түрлі қырынан көрініп, ән салып, викториналық сұрақтарға жауап береді.

Сапта жүріп, тыныштықты қорғап жүрген қызметкерлер қолына қару ғана емес, қара домбырасын ұстап, рух пен бірліктің жаршысы бола білгені де абзал.

Бұл байқаудың тағы бір ерекшелігі – өзге ұлт өкілдері мемлекеттік тілде өнер көрсетіп, бәсекеге түседі.

Биылғы шара пандемияға орай онлайн ұйымдастырылды. Әр өңірден 17 команда бақ сынасты. Бас аяғы 85 полиция қызметкері қатысты.

Байқаудың қорытындысы бойынша бас жүлдені Нұр-Сұлтан қаласының Полиция департаменті, 1-орынды Батыс Қазақстан облысының Полиция департаменті иеленді. 2-орындарды Алматы және Қостанай облыстарының Полиция департаменттері еншілесе, 3-орынға Ақмола, Түркістан облыстарының, Көліктегі Полиция департаменттерінің командалары жайғасты.

​Қазіргі таңда жүргізіліп жатқан реформалардың аясындағы негізгі міндеттердің бірі – қазақстандық полицейдің жаңа бейнесін қалыптастыру болып табылады.

​Осыған байланысты полицияның кәсіби ортасын нығайту, ішкі істер органдарында білім беру және тәрбие процесінің сапасын арттыру, сондай-ақ заманға сай кәсіби кадрларды даярлау мәселесіне осы дәстүрлі шараның да қосары мол екеніне сенімдімін.

Жеңімпаздарды құттықтап, отбасыларына береке, қызметтеріне табыс тілеймін!

• 15.09.2021
• 326