Биыл Шет ауданында 30-дан астам отбасы баспаналы болады

Шет ауданында жалға берілетін тұрғын үй құрылысы және жолдарды жөндеу барысымен таныстым.

Ақсу-Аюлы кентінде екі пәтерлі жеті үйдің құрылысы аяқталуда. Сонымен қатар, әкімдік 18 үйді сатып алды. Жыл соңына дейін кезекте тұрған 30-дан астам отбасы баспанамен қамтылады. Құрылыс қарқынын бәсеңдетпеуді және тұрғын үйді мерзімінде бітіруді тапсырдым. Қазіргі заманғы бассейн ашып, оның жанынан күрес залын салу жоспарда бар.

Ауданда ауылішілік жолдар белсенді түрде жөнделуде. Алты елді мекендегі 23 көше ретке келтірілді. «Ауыл – Ел бесігі» бағдарламасы бойынша тағы бірнеше ауылдың жолдарын орташа жөндеу басталды. Қазіргі уақытта 9 көше жөнделді. Шет ауданының ауылішілік жолдарының жартысынан көбі жақсы жағдайда, келесі жылы қалған көшелерді жөндеу жоспарланып отыр.

Алдағы жылыту маусымына дайындық бойынша 17 білім беру және 5 мәдени мекеме, 1 денсаулық сақтау ұйымы және 2 тұрғын үйдің жылу жүйесі жөнделді. Барлық коммуналдық мекемелер көмірмен қамтамасыз етілген.

Ағадырда қосымша үйлерге қосу арқылы қолданыстағы кәріз желілерін кеңейту аяқталуда. Кенттің төрт көшесінде сумен жабдықтаудың резервтік желісін жүргізу бойынша жұмыстар жүргізіліп жатыр.

Электрмен жабдықтау бойынша аудан тұрғындарының шағымдары көп. Бұл мәселені шешімін тапқанға дейін бақылауда ұстайтын боламын.

• 23.09.2021
• 236