Бірлік пен келісімді нығайтудың ең маңызды және өзекті мәселелері әрқашан Түркістан ассамблеясының басты назарында

30 қыркүйек күні Түркістан қаласында Қазақстан халқы Ассамблеясы Төрағасының орынбасары М. Әзілханов Түркістан облысы Ассамблеясының құрылымдары мен этномәдени бірлестіктерінің жетекшілерімен кездесті.

Іс-шараға Қазақстан Республикасы Ақпарат және қоғамдық даму министрлігі Этносаралық қатынастарды дамыту комитетінің төрағасы Ғ.Шойкин, облыс әкімінің орынбасары С.А.Қалқаманов және ҚХА құрылымдары мен этномәдени бірлестіктерінің өкілдері қатысты.

Кездесуде Мемлекет басшысының «Халық бірлігі және жүйелі реформалар – ел өркендеуінің берік негізі» Жолдауын іске асыруда облыстық Қазақстан халқы ассамблеясының атқаратын қызметі, сондай-ақ өңірдегі этносаралық келісімді нығайту жөніндегі алдағы шаралар талқыланды.

Түркістанның және облыстың дамуы ел басшылығының ерекше бақылауы мен жіті назарында. Түркістан өлкесі – түркі әлемінің киелі жері, ал Түркістан қаласы – оның мәдени және рухани астанасы, қазақ ұлтының қалыптасуының тарихи орталығы.

«Мемлекет басшысы күн тәртібіне этносаралық қатынастар саласындағы басты міндет – Қазақстанның көпэтносты халқын болашағы біртұтас ұлтқа біріктіру міндетін қойды. Болашағы біртұтас ұлт қандай болады? Болашағы біртұтас ұлт – мемлекеттік қазақ тілі этносаралық қатынас тілінің рөлін атқаратын азаматтық қауым. Ал қазақстандық патриотизм мен азаматтық қауым елдің барша этностары мен азаматтарының этностық және діни наным-сеніміне қарамастан біртұтас біріктіруші қағидатқа айналады», – деп атап өтті спикер.

Жиын барысында көптеген этномәдени орталықтар басшылары сөйлеп, ойларын ортаға салды. Ал соңында сөз алған Түлкібас ауданы Түрік этномәдени орталығының төрағасы Әбілов Жұмабек Жолшыұлы «Қазақстанда туып, өсіп-өніп қазір осы халыққа қызмет етіп жатырмыз. Қазір қоғамда «басқа ұлттар, өзге ұлттар» деген терминдер бар. Мен өзім қазақ ауылында туып, қазақ мектебінде оқыдым. Қазақ балаларымен бір балабақшаға барып, бір мектепте оқып ер жеттім. Енді келіп мені «мынау менің сыныптасым, ауылдасым, түрік досым, өзге ұлттың өкілі» деп айтса шыдай алмай ренжимін, көңіліме келеді. Біз бәріміз бір бауырмыз, туыспыз. Осы елдің туын көтеріп, тілінің мәртебесін асқақтатып, мемлекетіміздің дамуына үлес қосуға әрқашан да дайынмын» деп ағынан жарылды.

Сонымен қатар, ҚХА Төрағасының орынбасары Сауран ауданының этномәдени бірлестіктері мен жергілікті атқарушы органдардың өкілдерімен кездесті. Іс-шарада этносаралық өзара іс-қимылды нығайту мәселелері талқыланып, этносаралық қатынастарға ықпал ететін нақты әлеуметтік мәселелерді шешуге баса назар аударылды.

Анықтама үшін: Түркістан облысы халқының құрамы саналуандығымен  ерекшеленеді, өңірде 50-ден астам этностар мен этностық топтардың өкілдері тұрады.

Облыста 11 этномәдени бірлестік (өзбек, славян, түрік, күрд, иран, тәжік, шешен-ингуш, татар-башқұрт, әзірбайжан, грек және «Ынтымақ» этносаралық этномәдени бірлестігі) бар, аудандар мен қалаларда 7 филиал және 14 өкілдік жұмыс істейді.

• 01.10.2021
• 369