Тәуелсіз Мемлекеттер Достастығының Гидрометеорология жөніндегі Мемлекетаралық Кеңесінің (ТМД ГМК) 32-ші сессиясы

2021 жылдың 4 қазанында Тәуелсіз Мемлекеттер Достастығының Гидрометеорология жөніндегі Мемлекетаралық Кеңесінің (ТМД ГМК) 32-ші сессиясы өтті. Бұл отырыс — жыл сайынғы іс-шара. Ол Арменияның Ереван қаласында жүргізіледі деп жоспарланған болатын. Алайда ковидтік шектеулерге байланысты, қатысушылар оны онлайн режимінде өткізуге шешім қабылдады.

ТМД ГМК-нің 32 сессиясына Қазақстан, Армения, Белоруссия, Қырғызстан, Молдова, Тәжікстан, Түрікменстан, Өзбекстан, Ресей Федерациясы елдерінің делегациялары, сондай-ақ Дүниежүзілік метеорологиялық ұйымының және ТМД Атқарушы комитетінің өкілдері қатысты.

"Қазгидромет" РМК 2020-2021 жж. аралығында қол жеткізген жұмыстағы жетістіктерімен таныстырды. Мәселен аталмыш кезеңде,  қосымша станцияларды сатып алу есебінен, атмосфералық ауаны және жер үсті суларын бақылау бойынша, еліміздің барлық өңірлері 100% мониторингпен қамтылды. Сондай-ақ, 2021 жылдың қаңтарынан бастап барлық облыс орталықтарында озон анықталатын болды. Оған қоса, фермерлерге арналған "AgroData" қосымшасы енгізілді және агрометеорологиялық бақылау пункттерінің саны ұлғайтылды. Сонымен қатар, 2020 жылдың басынан, "су тасқыны қаупінің алдын алу және жою жөніндегі шаралар кешені" атты жол картасын іске асыру шеңберінде ашылған 42 жаңа гидрологиялық бекет жұмысқа кірісті. Талдықорған, Торғай, Шалқар, Жезқазған қалаларында үш сағаттан бір тәулікке дейінгі қысқа уақыт кезеңдеріне, дәл болжам жасауға арналған төрт доплерлік метеорологиялық радиолокатор (ДМРЛ) пайдалануға берілді.

Атап өтерлігі, сессия қатысушылары тәуелсіз экологиялық ұйымдармен және экобелсенділермен жұмыстағы Қазгидрометтің тәжірибесін жоғары бағалады, атап айтқанда: ынтымақтастық, біліммен алмасу және экология саласындағы проблемаларды жариялау мәселелерінде бірлескен өнімді жұмыс құру.

Қорытындылай келе, бірқатар шешімдер қабылданып, хаттамаларға қол қойылды, 2022 жылғы 33-ші сессия, "Қазгидромет" РМК-ның 100 жылдық мерейтойына орай, Қазақстан Республикасында өткізілетін болды.

• 05.10.2021
• 232