Қарағанды облысында ең ескі ЖЭО жаңғыртылады

Балқашта тұрғындардың тарапынан суық және ыстық су беру сапасына, жылыту кезеңінде және жалпы ТКШ бойынша орын алатын мәселелерге қатысты көптеген шағымдар бар. Сондықтан бұл мәселелерге ерекше назар аударылуда.

Балқаш ЖЭО-да барлық экономикалық және экологиялық талаптарға жауап беретін жаңа бесінші қазандық орнатылады. Бұл қала халқын үздіксіз сапалы жылумен қамтамасыз етуге және жаңа нысандарды орталық жылуға қосуға мүмкіндік береді. Биыл Қоңырат шағын ауданын орталық жылумен қамту мәселесі шешілді. ЖЭО-дан ұзындығы 17км болатын жылу желісі салынды. Жаңа жылу орталығының арқасында шағын ауданды одан әрі кеңейту мүмкіндігі пайда болды.

Қалада М1 және М2 магистральдық жылу желілерін ауқымды қайта құру жүріп жатыр. 60-шы жылдары салынған 5 км құбырлар ауыстырылады. Қазір құбырларды бөлшектеу аяқталып, 450 м жылу желілері алмастырылды. Жоба екі жылға есептелген. Ол аяқталғаннан кейін балқаштықтар сапалы жылумен қамтамасыз етіліп, ыстық су мәселесі шешіледі.

Биыл Балқашта ұзындығы 7,6 км сегіз көшенің автожолдарын орташа жөндеу және ұзындығы 1 км екі жаңа жолдың құрылысы бойынша жұмыстар жүргізілуде.

Абаттандыру кезінде әр аулада балалар алаңы орнатылады. Қазір төрт аула аумағында жұмыс жүріп жатыр. Сондай-ақ Тәуелсіздік алаңында скверді қайта құру қолға алынды. Бұл нысан келесі жылы ел игілігіне тапсырылады.

Сонымен қатар «Нұрлы жер» бағдарламасы аясында биыл 18 мың шаршы метр тұрғын үй пайдалануға беріледі. Кезекте тұрғандар қатарынан 130 адам баспанамен қамтамасыз етіледі. Мысалы, 9-шы шағын аудандағы көп пәтерлі тұрғын үй қалашығында тоғыз көпбалалы отбасы жаңа баспанаға ие болады.

• 14.10.2021
• 288