«МЫҢ БАЛА» РЕСПУБЛИКАЛЫҚ ЖОБАСЫНЫҢ ҚОРЫТЫНДЫЛАРЫ ШЫҚТЫ

Бүгін Нұр-Сұлтан қаласының әл-Фараби атындағы Оқушылар сарайында «Мың бала» республикалық мәдени-ағартушылық жобасы қорытындыланды.

 Аталған іс-шараға ҚР Ақпарат және қоғамдық даму министрлігінің Этносаралық қатынастарды дамыту комитетінің төрағасы Ғ.Шойкин, ҚР Парламенті Мәжілісінің депутаттары, ҚХА мүшелері, шығармашыл және ғылыми зиялы қауым, жоба жеңімпаздары, мемлекеттік тілді оқыту әдіскерлері, жастар ұйымдарының белсенділері мен мүшелері, блогерлер және БАҚ өкілдері қатысты.

«Мың бала» жобасының мақсаты – түрлі этнос балалары мен жастарын мемлекеттік тілді оқыту кезінде қазақ халқының ұлттық рухани құндылықтарына, мәдениетіне, салт-дәстүрлеріне, әдет-ғұрыптарына баулу арқылы қазақстандық бірегейлік пен бірлікті дамыту.

ҚР Ақпарат және қоғамдық даму министрлігінің Этносаралық қатынастарды дамыту комитетінің төрағасы Ғалым Шойкин  өз сөзінде қазақ тілін білу маңыздылығы, еліміздегі татулық пен бірлікті нығайту сияқты асқаралы міндет жүктелген Қазақстан халқы Ассамблеясы мемлекеттік тілді дамыту бағытында дәйекті жұмыс жүргізіп жатқанын атап өтті.

Биыл «Мың бала» жобасы аясында «Тіл мектебі» авторлық курсы ұйымдастырылды, еліміздің барлық өңірлерінен келген әдіскерлер тілді оқытудың инновациялық әдістерін игерді.

Іс-шара барысында «Мың бала» республикалық мәдени-ағартушылық жобасының үш номинациясы «Тіл мектебінің» әдіскерлері», «Өнер алды – қызыл тіл» және «Өнерлі өрге жүзер» бойынша конкурстарының жеңімпаздары марапатталды.

Жалпы, 48 қатысушы марапатқа ие болды.

Естеріңізге сала кетейік, бүгінгі таңда елімізде 5644 ұйым балаларды қазақ тілінде оқытып-тәрбиелейді, 3798 қазақ мектебі жұмыс істейді. Достық үйлерінде, республиканың этномәдени бірлестіктерінде 174 жексенбілік мектеп жұмыс істейді, оларда мемлекеттік тілде оқытатын 124 топ бар.

Жүргізілген жұмыстардың арқасында қазақ тілін білетін түрлі этнос жастарының саны күн сайын артып келеді.

• 16.11.2021
• 288