Нұрлан Ноғаев қаржы саласының қызметкерлерін кәсіби мерекелерімен құттықтады

Бүгін, 15 қараша күні Ақтауда ҚР қаржы жүйесінің 100 жылдығы және Ұлттық валюта – теңгенің айналымға енген күні мен қаржы қызметкерлерінің кәсіби мерекесіне арналған салтанатты жиын өтті, деп хабарлайды Маңғыстау облысы әкімінің баспасөз қызметі. 

Салтанатты шарада өңір басшысы Нұрлан Ноғаев облыстағы қаржы жүйесінің ардагерлері мен қызметкерлерін кәсіби мерекесімен құттықтап, ел экономикасын өркендету жолындағы қызметтеріне табыс тіледі.

- Тәуелсіздік жылдарында ел экономикасының қалыптасуы мен қарқынды дамуына қаржы жүйесі қызметкерлерінің қосқан үлесі орасан зор. Бүгінде біздің алдымызда Мемлекет басшысы мен Үкімет қойған жаңа міндеттер тұр. Ол - экономикалық өсу мен халықтың әлеуметтік әл-ауқатын арттыруды қамтамасыз ету үшін бюджет ресурстарын тиімді пайдалану. Біздің қаржыгерлер бұл істе де барлық күш-жігерін, тәжірибелік, іскерлік мүмкіндіктерін жұмсайтынына сенемін, деді облыс әкімі.

Құттықтау сөзінен кейін Нұрлан Ноғаев  бір топ қаржыгерді  ҚР Қаржы министрлігінің «Қаржы қызметінің үздігі» төсбелгісімен, ҚР Қаржы министрлігінің және облыс әкімінің «Алғыс хаттарымен» марапаттады.

• 17.11.2021
• 181