Ұлттық экономика вице-министрі АҚШ Мемлекеттік хатшысы көмекшісінің міндетін атқарушымен кездесті

Ұлттық экономика вице-министрі Әлібек Қуантыров АҚШ Мемлекеттік департаментінде АҚШ Мемлекеттік хатшысының экономикалық және іскерлік мәселелер жөніндегі көмекшісінің міндетін атқарушы Эрик Вудхауспен Экономикалық ынтымақтастық және даму ұйымы (ЭЫДҰ) мәселелері бойынша кездесу өткізді.Вице-министр атап өткендей, Қазақстан ЭЫДҰ-ның бірқатар өңірлік бастамаларының ұзақ уақыттан бергі белсенді қатысушысы. 2021 жылы ЭЫДҰ-ның Орталық Азия елдері бойынша бастамасында Еуразиялық бәсекеге қабілеттілік бағдарламасының тең төрағасы болып сайланды. Бұл Қазақстанның еуразиялық кеңістікте ЭЫДҰ-ның үздік тәжірибесі мен стандарттарын таратуда өзіндік «хаб» болуына мүмкіндік береді.«Бүгінде Қазақстан ЭЫДҰ-ның жекелеген жұмыс органдарына ерекше қызығушылық танытып отыр. Олардың қызметі Қазақстанның Ұлттық даму жоспарында қойылған мақсаттарды іске асыруға көмектеседі. Мұндай жұмыс органдарына Жұмыспен қамту, еңбек және әлеуметтік мәселелер жөніндегі комитет, Сауда жөніндегі комитет, Корпоративтік басқару жөніндегі комитет, Дамуға жәрдемдесу жөніндегі комитет, Ауыл шаруашылығы жөніндегі комитет, сондай-ақ Цифрлық экономика саясаты жөніндегі комитет жатады», - деді Қуантыров.Ұлттық экономика министрлігі басшысы орынбасарының айтуынша, Қазақстанның комитеттерге қатысуы және осы бағыттардағы жаңа саясатты іске асыруы қазақстандық экономика үшін экономикалық тиімділікті дамытуға, орнықты және инклюзивтік өсуге, қаржылық тұрақтылықа ықпал етеді.Э.Вудхаус жаңа әкімшіліктің ұйымның одан әрі өсуіне және нығаюына бейілділігін жариялады. Өйткені бұл прогрессивті, озық тәжірибелердің кеңінен жаһандық таралуын білдіреді. Осыған байланысты америкалық тарап Қазақстанның ЭЫДҰ-ға кіру мәселесіне шынайы көзқарасын атап өтіп, белсенді диалогты жалғастыруға дайын екенін білдірді.«Біз 30 жылғы дипломатиялық қарым-қатынасымызды өзара тиімді түрде құра алдық. Таяу жылдары оны жаңа деңгейге көтеретінімізге сенімдімін. Бүгінгі кездесу осы бағытқа өз үлесін қосады деп үміттенемін», - деді вице-министр.

• 18.11.2021
• 202