Түркі мемлекеттерінің диаспоралар істері жөніндегі жауапты ұйым басшылары мен министрліктерінің IV және жұмыс тобының VI отырыстары өтті

Қазақстан Республикасының Ақпарат және қоғамдық даму министрлігі Түркі мемлекеттері ұйымдарының жауапты министрлері мен мекеме басшыларының қатысуымен диаспоралар істері жөніндегі түркі мемлекеттері ұйымының отырысын өткізді.

Қазақстан тарапынан Қазақстан Республикасының Ақпарат және қоғамдық даму вице-министрі С.Егізбаев, Этносаралық қатынастарды дамыту комитетінің төрағасы Ғ. Шойкин, «Отандастар қоры» КЕАҚ вице-президенті М. Сарбасов, ҚР Сыртқы істер министрлігінің қызметкерлері қатысты.

Шетелдік өкілдер қатарында Түркі кеңесі Хатшысының орынбасары Кысмет Гозалов, Түркия Республикасы Үкіметі жанындағы шет елдердегі түрік істері және туысқандық қоғамдастықтар басқармасының (YTB) президенті Абдуллах Эрен, Әзербайжан Республикасы Диаспора істері жөніндегі мемлекеттік комитетінің төрағасы Фуад Рауф оглы Мурадов, Өзбекстан Республикасы Министрлер кабинеті жанындағы Шет елдермен ұлтаралық қатынастар және достық байланыстар жөніндегі комитеттің төрағасы Рустамбек Курбанов, Қырғыз Республикасы Сыртқы істер министрлігі жанындағы сыртқы көші-қон департаментінің директоры Таштанбек Каймазаров бар.

Отырыстардың күн тәртібінде түркітілдес диаспоралардың қазіргі жағдайының өзекті мәселелері, түркі мемлекеттері ұйымы елдері арасындағы ынтымақтастықты үйлестіру және нығайту, түркітілдес диаспоралар арасындағы өзара іс-қимылдың тиімділігін арттыру жолдары талқыланды.

Іс-шаралар бағдарламасы шеңберінде түркі тілдес елдер арасындағы ынтымақтастықты нығайтуға арналған бірлескен жоспарларды іске асыру, форумдар, тренингтер, фестивальдер, жастар лагерлері мен мерекелік іс-шараларды өткізу мәселелері қаралды.

Шетелдік өкілдер Қазақстан Республикасына алғыстарын білдіріп, Түркі мемлекеттерінің диаспоралар істері жөніндегі ұйымының отырысына жоғары баға берді.

• 19.11.2021
• 319