«Бейбітшілік пен келісім жолымен» ҚХА тележобасын таныстыру рәсімі өтті

 ҚР Тұңғыш Президенті – Елбасы Музейінде ҚР Тәуелсіздігінің 30 жылдығына арналған Қазақстан халқы Ассамблеясының «Бейбітшілік пен келісім жолымен» тележобасының қорытындыларының тұсаукесері, сондай-ақ журналистика саласындағы «Шаңырақ» республикалық байқауының жеңімпаздарын марапаттау рәсімі өтті.

Іс-шараларға Қазақстан халқы Ассамблеясы төрағасының орынбасары – Хатшылық меңгерушісі М. Әзілханов, Қазақстан халқы Ассамблеясы төрағасының орынбасары М. Бекбаева, Қазақстан Республикасы Парламентінің депутаттары, мемлекеттік органдардың, «Nur Otan» партиясының, этномәдени бірлестіктердің өкілдері, Қазақстан халқы Ассамблеясының, журналистер клубының мүшелері, қоғам қайраткерлері, ғылыми және шығармашылық зиялы қауым өкілдері, жастар ұйымдарының белсенділері мен мүшелері, блогерлер мен БАҚ өкілдері қатысты.

Іс-шара барысында ҚХА-ның «Бейбітшілік пен келісім жолымен» фильмі көрсетілді. Тележобаның мақсаты – еліміздің басты құндылықтарының бірі – қоғамдық келісім мен жалпыұлттық бірлік моделін ілгерілету.

Тұсаукесерде сөз сөйлеген М. Әзілханов «Бейбітшілік пен келісім жолымен» жобасының мазмұны мен мағынасы жағынан өте маңызды екенін атап өтті.

Спикердің айтуынша, жоба Қазақстан дамуының жаңа кезеңіндегі бірлік, бейбітшілік және келісім саясатының стратегиялық сабақтастығын білдіреді, сондай-ақ Тәуелсіздіктің 30 жылы ішіндегі осы саясатты танымдық тревэл-шоудың жаңа форматында қорытындылауға жасалған талпыныстардың бірі болып табылады.

Ассамблея төрағасының орынбасары аймақтардың, еңбек ұжымдарының, нақты адамдардың тағдыры арқылы фильм авторлары экономикалық, әлеуметтік және жанды адами мысалдарда бейбітшілік пен келісім саясатының эволюциясы мен нәтижелерін бақылағанын атап өтті.

Оның айтуынша, өзін Қазақстанның азаматтары мен патриоттары ретінде сезінген түрлі этностар, жас және мамандық иелері бізге бұрынғы Кеңес Республикасының көпэтносты халқын Тәуелсіз Қазақстанның біртұтас халқына біріктірудегі Ассамблеяның тарихи еңбегі мен рөлін айқын көрсетеді.

Фильмнің тағы бір маңызды мазмұны Қазақстан халқы Ассамблеясының – Елбасы құрған институттың біріктіруші рөлін ашу болып табылады.

Қорытындылай келе, М. Әзілханов бұл фильмді көргендердің бәрі өз елі үшін мақтаныш сезіміне бөленетініне, мемлекеттің ертеңі мен болашағына деген үлкен сенім сезінетініне сенім білдірді.

Ол сондай-ақ жобаның шығармашылық тобына алғысын білдірді.

Тұсаукесер қорытындысы бойынша ҚХА төрағасының орынбасары – Майя Бекбаева бастаған түсірілім тобының мүшелерін, медиа-саладағы мемлекеттік және мемлекеттік емес ұйымдардың, сондай-ақ фильмнің жасалуына үлес қосқан өңірлердің өкілдерін марапаттау рәсімі өтті.

Анықтама үшін:

Фильм бес бөлімнен тұрады: «Батыс», «Шығыс», «Солтүстік», «Оңтүстік» және «Орталық». Бұл әр өңірдің әлеуметтік-мәдени, экономикалық дамуын көрсететін 300-ден астам нысан және 35 негізгі кейіпкер-әр түрлі этностардың, кәсіптердің өкілдері, олар күнделікті өмірде бейбітшілік пен келісім саясатын жүзеге асырудың үлгісі болып табылады.

• 06.12.2021
• 383