Бүгін Мұратхан Шоқанның Қазақстан Республикасы Тәуелсіздігінің 30 жылдық мерейтойы қарсаңында жарыққа шыққан «Қандастар үлесі» атты жаңа кітабының тұсаукесері өтеді

Бүгін Қазақстан Республикасы Ақпарат және қоғамдық даму министрлігінің қолдауымен «Отандастар қоры» КеАҚ Нұр-Сұлтан қалалық әкімдігі жанындағы «Қоғамдық келісім» КММ (Достық үйі) ұжымымен бірлесе отырып, қаламгер қандасымыз, ақын, Қазақстан Жазушылар Одағының мүшесі, «Тұлға-достық» қоғамдық қорының директоры Мұратхан Шоқанның Қазақстан Республикасы Тәуелсіздігінің 30 жылдық мерейтойы қарсаңында жарыққа шыққан «Қандастар үлесі» атты жаңа кітабының тұсаукесерін өткізеді.

Жаңалыққа жаны құмар көпшілікке арналған игі шара 2021 жылғы 7 желтоқсанда, сағат 15.00-де, Достық үйінде өткізіледі.

Қарымды қаламгердің «Қандастар үлесі» атты жаңа жинағында Тәуелсіздік алған алғашқы жылдан бастап ҚР Тұңғыш Президенті – Елбасы Нұрсұлтан Назарбаев сара жол салып, бүгінде Мемлекет басшысы  Қасым-Жомарт Тоқаев жіті назарда ұстайтын қандастар тақырыбы қамтылған.

Тың ақпараттарға бай туындыда тарихи Отанымен табысқан бауырларымыздың егеменді еліміздің өсіп-өркендеуіне қосқан сүбелі үлесі жайында және өздері еңбек ететін салада көш басынан көрініп жүрген озық ойлы ғалымдар мен кәсіби мамандар, талантты өнерпаздар мен танымал спортшылар және іскер кәсіпкерлер туралы жазылған.

Тұсаукесер рәсімі аясында әлемнің әр шалғайынан атажұртқа оралған  қандастардың жемісті еңбегі мен жетістіктерінен сыр шертетін кітаптар, суреттер мен қолөнер бұйымдары көрмесі де көпшілік назарына ұсынылады.

Жоспарлы іс-шараға ҚР СІМ, ҚР МСМ, ҚР БҒМ, ҚР ІІМ Көші-қон қызмет комитетінің өкілдері және зиялы қауым, ақын-жазушылар, ғалымдар, алыс-жақын шет елдерден келген қандастарымыз бен сан алуан салада табысқа жеткен танымал тұлғалар қатысады деп күтілуде.

• 07.12.2021
• 235