Маңғыстау облысы әкімдігінің жанындағы Жобалық офис - 2021 жылдың үздігі атанды

Бүгін, 7 желтоқсанда Мемлекет басшысы  Қасым-Жомарт Тоқаевтың бейнебайланыс режимінде қатысуымен «Алтын сапа» және «Парыз» сыйлықтарының иегерлерін салтанатты түрде марапаттау рәсімі өтті.

Қасым-Жомарт Тоқаев өз сөзінде «Алтын сапа» байқауы 15 жылдан бері өткізіліп келе жатқанын және бүгінге дейін 150-ден астам компания Президент сыйлығының иегері атанғанына назар аударды.

–  Биылғы салтанатты жиын Тәуелсіздіктің 30 жылдық мерейтойымен тұспа-тұс келіп отыр. Мұның зор символдық мәні бар. Егемендік кезеңінде Қазақстанда бизнестің дамуына жан-жақты жағдай жасалды. Соның нәтижесінде жаңа заманға сай кәсіпкерлер шоғыры қалыптасты. Олар ұлттық экономиканың басты қозғаушы күшіне айналуда, – деді Мемлекет басшысы. 

Марапат аясында, Маңғыстау облысы әкімдігінің жанындағы Жобалық офисі республикалық «Qazaqstan Project Management Awards 2021» жобалық менеджментті жетілдіру конкурсының «Жылдың үздік жобалық офисі» номинациясы бойынша жеңімпаз атанып, ҚР Президентінің «Алтын сапа» сыйлығын иеленді. 

Байқауға аталған номинация бойынша орталық мемлекеттік органдар мен жергілікті атқарушы органдардың 27 жобалық офистері қатысқан. Білікті сарапшы-асессорлардың жоғары бағасын алған Маңғыстау облысы әкімдігінің жобалық офисі – жыл үздігі атанды.

Айта кетсек, мемлекеттік жоспарлау жүйесінде жобалық басқаруды құру туралы Маңғыстау облысының Жобалық офисі - 2020 жылы облыс әкімінің «ҚР жергілікті және өзін-өзі басқару" туралы заңына сәйкес құрылды. 

Офис - ұлттық және өзге де жобаларды әзірлеу, олардың іске асырылуының жедел мониторингін қамтамасыз ету мақсатында қызмет етеді.

• 07.12.2021
• 143