Тарифтік саясат жөніндегі кеңестің кезекті отырысы өткізілді

9 желтоқсан күні  Ұлттық экономика вице-министрі Азамат Амриннің төрағалығымен ҚР Парламенті қос палатасы депутаттарының, орталық мемлекеттік органдар, жергілікті атқарушы органдар, «Атамекен» Ұлттық кәсіпкерлер палатасы өкілдерінің, Табиғи монополияларды реттеу комитеті басшылығының, сондай-ақ үкіметтік емес ұйымдардың қатысуымен Тарифтік саясат жөніндегі кеңестің кезекті отырысы өткізілді.

 «Коммуналдық қызметтердің үздіксіз және сапалы берілуін қамтамасыз ету мақсатында айтарлықтай инвестиция тарту қажет. Бұл тариф өсуіне еріксіз алып келуі мүмкін. Алайда, тұтынушы мен табиғи монополиялар субъектілері арасындағы мүдделер теңгерімін сақтауды ескере отырып, шешім қабылдау қажет», - деді Азамат Амрин.

Табиғи монополияларды реттеу комитетінің 2021 жылғы қызметінің қорытындылары және 2022 жылғы тарифтің инфляцияға болжамды жиынтық үлесі туралы тарифтік ведомствоның төрағасы Асан Дарбаев баяндады.

ТМРК төрағасы 2021 жылғы бірінші тоқсанда тұрғындарға арналған тарифтің өсуін тежеу және болдырмау, сондай-ақ 2020 жылдың қорытындысы бойынша реттелетін коммуналдық қызмет тарифінің инфляцияға салымын 0,11% деңгейінде сақтауды қамтамасыз ету бойынша қабылданған шаралар туралы хабарлады.

Асан Дарбаев сонымен қатар ведомствоның 2022 жылы реттелетін коммуналдық қызмет тарифінің инфляцияға оң үлесі бойынша жұмыс жалғастырылатынын атап өтті.

Бұдан басқа, бірқатар ұйымдар мен уәкілетті органдардағы кадрлық өзгерістерге байланысты 17 өңірлік комиссияның құрамы кезекті рет кеңейтіліп, өзектендірілді, сондай-ақ тариф белгілеу мәселесін қарауға көп адам тарту мақсатында олардың дербес құрамы толықтырылды.

Өңірлік комиссиялардың негізгі міндеті инвестициялық бағдарлама жобаларын талқылау мен оларға ұсыным әзірлеу, бекітілген тарифтік сметалардың орындалуы туралы есепті тыңдау, тарифтік реттеу әдісін айқындау бойынша ұсыныс енгізу және т. б.

Кеңес отырысының қорытындысы бойынша Азамат Амрин Комитетке сапалы және сенімді коммуналдық қызмет көрсетуді қамтамасыз ететін әділ тариф белгілеу, сондай-ақ монополистердің қаражатты нысаналы пайдалануын бақылау жұмысын жалғастыруға тапсырма берді.

• 10.12.2021
• 271