Қарағандыда ұлы ақын Қасым Аманжоловтың 110 жылдық мерейтойына орай мұражай-үй ашылды

Қасым үйінің ашылуы мерейтойлық жылдың өңірдегі айшықты оқиғасына айналды. Жалпы алғанда ақын мерейтойының аясында 500-ге жуық түрлі іс-шаралар өткізілді.

Дауылпаз ақын туралы бізге жеткен бағалы естеліктер бар. Қарағандыда Қасым Аманжолов атындағы көше ашылып, оның ескерткіші орнатылды. Сондай-ақ біраздан бері «Қасым» журналы жарық көруде. Жыл сайын Қасым Аманжолов оқулары, ғылыми-практикалық конференциялар, айтыстар, поэзия кештері өткізіледі.

Енді Қасым Аманжоловтың өмірі мен шығармашылық еңбегі туралы осы Қасым үйінде арнайы ашылған мұражайдан мол дерек алуға болады. Онда қаламгердің сирек қолжазбалары мен кітаптары, жеке заттары және фотосуреттерінің экспозициясы ұсынылған.

Сондай-ақ шара барысында Евней Бөкетов атындағы Қарағанды университетінің «Қасымтану» ғылыми-зерттеу орталығының ғалымдары дайындаған екі томдық тамаша кітаптың тұсауы кесілді. Кітапта Қасым Аманжоловтың өмірі мен шығармашылығын зерттеуге арналған материалдар мен ақын туралы естеліктер жинақталған.

Қасым үйінің ғимаратында Жазушылар мен Журналистер одақтарының облыстық филиалдары, «Қасым» журналының редакциясы орналасқан. Алдағы уақытта мұнда Өңірлік коммуникациялар қызметі де жұмыс жасайтын болады.

• 15.12.2021
• 198