Ақтауда апатты үйдің тұрғындары жаңа баспанаға көшірілді

Ақтаудағы апатты жағдайдағы қос тұрғын үйдегі 32 отбасыға жаңа пәтердің кілті табысталды,-деп хабарлады Ақтау қаласы әкімінің баспасөз қызметі. 

Ел Тәуелсіздігінің 30 жылдығы қарсаңында қуанышқа кенелген тұрғындарды Ақтау қаласы әкімінің орынбасары Алпысбай Таубаев ұлық мерекемен құттықтап, шаңырақтарына шаттық тіледі. 

«2014 жылы осы шағынауданда 15 тұрғын үй апаттық деп танылып, реновация бағдарламасы аясында жаңа тұрғын үйлер тұрғызылған болатын.  Бүгін қаладағы соңғы апаттық жағдайдағы 71-ші және 72-ші үйлердегі тұрғындар жаңа үйге көшірілді. Қоныстарыңыз құтты болсын»,-деді қала әкімінің орынбасары. 

Бұл көпқабатты тұрғын үйді бағдарлама аясында «Құрылыс Строй Сервис» ЖШС тұрғызды. Жаңа үй түрғындардың осы уақытқа дейін тұрған ескі үйге жақын маңда орналасқан.  

Іргесі сөгіліп жатса да кетіп қала алмадым, жаңа пәтерден үмітімді үзбедім. Алғашында үміттен гөрі күдік басым болды. Дегенмен, қала әкімдігі берген уәдесін орындады. Біз үйіміз қашан құлайды деген қорқыныштан бір жола айықтық,-деп жаңа қоныс иелері апатты үйдің мәселесін шешуге атсалысқан азаматтарға алғысын жеткізді.  

Енді салынғанына жарты ғасырдан астам уақыт болған апатты жағдайдағы қос үй сүріліп, орнына жаңа тұрғын үй бой көтермек. Осылайша қала бойынша апаттық үйлердің мәселесі толықтай шешімін тапты.

• 20.12.2021
• 132