Маңғыстауда қоғам қайраткері Меңдеш Салиховтың өмір жолына арналған кітаптың тұсаукесері өтті

Өңір басшысы Нұрлан Ноғаевтың қатысуымен журналист Наталья Задерецкая жазған «Идеи, воплощённые в жизнь» кітабының тұсаукесері өтті, деп хабарлайды Маңғыстау облысы әкімінің баспасөз қызметі. 

Аталған еңбек Ақтау қаласы мен Маңғыстау ауданының құрметті азаматы М.Салиховтың өмір жолын жан-жақты қамтыған. 90-шы жылдардың басында ол облыстың ұлттық - мәдени орталықтары арасында берік достық байланыс орнату жолында зор күш-жігер жұмсады. 

Меңдеш Халелұлы сонымен қатар өңірдегі мұнай саласының дамуына да елеулі үлес қосқан. Ол еңбек жолын мұнай өндіру жөніндегі оператордан бастаған. Кейін еліміздегі ең ірі мұнай өндіру кәсіпорнының басшысы болып тағайындалды. Мұнайшылардың отбасында дүниеге келген М.Салихов мектептен кейін Губкин атындағы Мәскеу мұнай-химия және газ өнеркәсібі институтына түсті. 1982 жылдан 1991 жылға дейін партия комитетінің хатшысы, Қазақ КСР КП Шевченко қалалық комитетінің екінші хатшысы, Шевченко қалалық атқару комитетінің төрағасы, Маңғыстау облысы әкімінің орынбасары болып жұмыс істеді. 1992-95 жылдары Массачусетс университетінде оқып, АҚШ-тың Даллас қаласындағы «Oryx Energy» компаниясының қазақстандық жобалар жөніндегі кеңесшісі, директоры болып қызмет атқарған. 1995-97 жылдары «Маңғыстаумұнайгаз» акционерлік қоғамының президенті және басқарма төрағасы болды. 1997 жылы жеке кәсіппен айналысып, бірқатар мұнай сервистік компаниясын басқарды. М.Салихов - Ауғанстандағы ұрыс қимылдарының ардагері. Оны замандастары елінің біртуар азаматы, туған жерінің шын жанашыры деп ерекше құрметтейді. Оған арналған кітап Маңғыстау облысының мемлекеттік мұрағатының материалдары негізінде жазылған.

Облыс әкімі Нұрлан Ноғаев шараға қатысушыларды ҚР Тәуелсіздігінің 30 жылдығымен құттықтап, Мендеш Салиховтың өңірді дамыту жолындағы ерен еңбегін атап өтті.

 - Өткен ғасырдың соңында халқымызға оңай болған жоқ. Біздің алдымызда өз экономикасы бар, шекарасы шегенделген жаңа, тәуелсіз мемлекет құру міндеті тұрды. Елбасының арқасында біз осы кезеңнен өттік, қазір Мемлекет басшысының салиқалы саясаты арқылы орнықты даму жолына түстік. Тәуелсіздік таңында халқымыз Тұңғыш Президентке сеніп, ата - бабаларымыздың арманын жүзеге асыру үшін бар күш-жігерін жұмсады. Солардың бірі Меңдеш Салихов болды. Алып азамат жайында жазылған бұл еңбектің ел ертеңі - жас ұрпаққа өнеге, тағылым болары сөзсіз- деді аймақ басшысы.

• 20.12.2021
• 197