Маңғыстау облысында 2022 жылы 420 мың тонна темірбетон бұйымдарын өндіру жоспарлануда

Аймақ басшысы Нұрлан Ноғаев 420 мың тоннаның 83 мың тоннасын шығаруды жоспарлап отырған «Cement-Beton-M» ЖШС жұмысымен танысты, деп хабарлайды облыс әкімінің баспасөз қызметі.

«Cement-Beton-M» ЖШС бірнеше жылдан бері Маңғыстау облысындағы тауарлық бетонды өндіру және жеткізу бойынша жетекші компаниялардың қатарында. Компания М-100-ден М-500-ге дейінгі бетонның барлық маркасын және М-50-ден М-150-ге дейінгі бетон ерітіндісін шығарады. Сонымен қатар зауыттың бетонның ауыр маркаларын шығаруға қауқары бар. Өндірісте шығарылатын өнімнің сапасын бақылауға арналған неміс жабдығы бар, аттестатталған зертхана жұмыс істейді. 

2020 жылы компания қызметін кеңейту мақсатында АҚ «БЖК-2025» мемлекеттік бағдарламасының екінші бағыты аясында Ақтау қаласындағы «Қазақстан Халық Банкі» қарызға қаражат алады. Бұл жоба аясында 30 жұмыс орны ашылды. 

2020 жылдың қараша айында «Cement-Beton-M» ЖШС «Даму» қорының мемлекеттік қолдауы арқылы 1 млрд. 216 млн. 619 мың теңге несие алды. 2021 жылдың мамыр айында кәсіпорын темірбетон бұйымдарын өндіруге арналған жабдықты сатып алды. Қазір зауытта арнайы цехты дайындау жұмыстары жүргізілуде. Келесі жылдың басында Маңғыстауға құрал-жабдықтарды монтаждау бағытында Германиядан тәжірибесі бар жетекші мамандар келеді деп күтілуде.

Облыста сондай-ақ, 2014 жылы Шетпе селосында Қазақстанды индустрияландыру картасы аясында іске қосылған «Каспий Цемент» ЖШС цемент зауыты жұмыс істейді. Зауыттың қуаттылығы жылына 800 мың тонна цемент. «Каспий Цемент» ЖШС-нің өңірдің құрылыс индустриясындағы үлесі 60% құрайды.

Бұдан бөлек, Маңғыстауда темірбетон бұйымдарын шығаратын кәсіпорындар бар: «Өндірістік кәсіпорындар басқармасы» ЖШС, «Теміртас-1» қуаттылығы 75 мың тонна темірбетон бұйымдары, «КИС-Ақтау» ЖШС қуаттылығы 22 мың текше метр темірбетон бұйымдары, «ДСК-Қараойқұрылыс» ЖШС, «Еврострой» ЖШС, онда жылына 5000 данадан астам темірбетон бұйымдары өндіріледі.

Маңғыстауда жол-құрылыс материалдарын өндірумен «Каспий Тас Жол» ЖШС және «МКДСМ» АҚ айналысады. Керамзит тасын «Ақтау Керамзит» ЖШС өндіреді. Резеңке және пластмасса бұйымдарымен «АктауПолимер» ЖШС, «Каспио Пласт» ЖШС және «KazTrub-Industries» ЖШС айналысады. «Satex Chemie» ЖШС битум негізінде гидрооқшаулағыш материалдар өндіреді.
   
Кездесу қорытындысы бойынша облыс әкімі жауапты тұлғаларға бірқатар нақты тапсырма берді.

• 20.12.2021
• 154