- Блогтар
- Елібаев М.Т.
Елібаев М.Т.
«Қазақстанның Даму Банкі» АҚ Басқарма төрағасы
Екібастұзда жаңа ферроқорытпа зауытының құрылысы басталды
«EkibastuzFerroAlloys» ЖШС Павлодар облысында ферросилиций шығаратын жаңа зауыт салу үшін «Қазақстанның Даму Банкі» АҚ-ның («Бәйтерек» ұлттық басқарушы холдингі» АҚ еншілес ұйымы, бұдан әрі – Банк, ҚДБ) қаржыландыруын тартты. Жобаның жалпы құны 92,2 млрд теңгені құрайды, оның ішінде ҚДБ кредиттік желісі 72 млрд теңге сомаға ашылған, инвесторлардың меншікті қатысу үлесі 20 млрд теңгеден асады.
Жоба әрқайсысы 94,5 МВА-дан 4 пеші бар заманауи зауыт салуды көздейді. Осы пештердің ең жоғары өндірістік қуаты жылына 240 000 тонна жоғары сапалы ферросилицийді құрайды. Толық автоматтандырылған жаңа кәсіпорынды іске қосу 2023 жылға жоспарланған, зауыт ферросилицийге деген жаһандық сұранысты қанағаттандыруға бағытталған. «EkibastuzFerroAlloys» ЖШС компаниясы өз өнімдерін Еуропа, Оңтүстік-Шығыс Азия, Солтүстік және Оңтүстік Америка нарықтарында сатуды жоспарлап отыр. Дайын өнімді өткізуге тиісті келісімдер мен оффтейк келісімшарттар жасалды. Алдын ала есептеулерге сәйкес, экспорттың құндық көлемі жылына 76 млрд теңгені құрайды.
Жаңа кәсіпорын "Екібастұз ГРЭС-1" ЖШС-нің жанында орналасады, бұл шикізат пен электр энергиясы көздеріне жақын орналасқандықтан өндіріс қауіпсіздігін қамтамасыз етеді. Осы жобаны іске асыру 800 адамды тұрақты жұмыспен қамтамасыз етуге мүмкіндік береді.
Кәсіпорын құрылтайшыларының айтуынша, зауыттың техникалық жабдықталуы барлық әлемдік сапа стандарттарына сәйкес келетін болады. Дәл осындай жүйе бойынша Қарағанды қаласында – «YDD Corporation» ЖШС және «Qaz Carbon» ЖШС ұқсас жобалары іске асырылды.
Екібастұзда жаңа ферроқорытпа зауытының құрылысы акционерлер тобымен бірлескен алғашқы жобамыз емес, бұрын Қарағанды облысында ферроқорытпа зауыттары мен агломерациялық фабрикаларды іске қосу кезінде де бірге қызмет жасаған болатынбыз. Екі жоба да өңір үшін ғана емес, бүкіл ел үшін табысты, экономикалық тұрғыдан қалыптасқан және әлеуметтік маңызы зор. Сондықтан да бізде бар тәжірибе мен құзыреттер қазақстандық металлургияны әлемдік индустрияның мүлдем жаңа деңгейіне шығара алатын осы жобаны табысты іске асыруға көмектесетініне күмәніміз жоқ.
- 20.12.2021
- 204