Маңғыстауда «Ұрпаққа ұран, елге мұра» атты мерекелік шара өтті

Бүгін, 20 желтоқсан күні облыс әкімі Нұрлан Ноғаев ел Тәуелсіздігінің 30 жылдығына арналған салтанатты шараға қатысып, егемендік жылдары өңірдің өркендеуіне үлес қосқан бірқатар азаматтарды марапаттады, деп хабарлайды Маңғыстау облысы әкімінің баспасөз қызметі.

«Ұрпаққа ұран, елге мұра» атты мерекелік шараға зиялы қауым өкілдері,  қоғам белсенділері, ардагерлер және жергілікті атқарушы орган басшалары қатысты.

Салтанатты кеште сөз алған облыс әкімі Нұрлан Ноғаев татулықты ту еткен халқымыздың ұлық мерекесімен құттықтап, жасампаздыққа толы жылдарда мемлекетіміздің жеткен жетістіктеріне тоқталды.

-Тәуелсіз еліміздің әлем картасында өз орнын алып, жер-жаһанға танылуында оның іргетасын қалап, шекарасын шегендеген Тұңғыш Президентіміз - Елбасы Нұрсұлтан Әбішұлы Назарбаевтың еңбегі орасан зор. Бүгінде Елбасының сындарлы саясатын Президент Қасым-Жомарт Тоқаев  жалғастырып,  ұзақ мерзімді стратегиялық құжаттарда көзделген межелерге жету жолын айқындап берді. Біз - өткенімізге құрметпен қарап, болашағымызға сеніммен көз тіккен халықпыз. Сондықтан, осы бостандық туын құлатпай, ауызбіршілікпен және адал еңбекпен Тәуелсіз елімізді жаңа белестерге көтеруге шақырамын», - деді облыс әкімі.

Мерекелік кеште егемендік жылдары өңірдің өркендеуіне елеулі үлес қосқан 100-ге жуық маңғыстаулық «Құрмет» орденімен,  «Ерен еңбегі үшін», «Халық алғысы», «Тәуелсіздікке 30 жыл» мерекелік медальдарымен және т.б. марапатталды. 

Салтанатты шара мерекелік концертпен жалғасты. ҚР Халық әртісі Роза Рымбаева, ҚР еңбек сіңірген әртісі Тұрар Әліпбаев және жергілікті өнерпаздар әннен шашу шашты.

• 21.12.2021
• 188