Облыста тарихи айтулы күн болды

Құрметті жерлестер!

Облыста тарихи айтулы күн болды. Мереке қарсаңында еліміздің Тәуелсіздік монументін салтанатты түрде аштық. Іс-шараға Қазақстан Республикасының Премьер-министрі Асқар Мамин қатысты. Өз сөзінде ол Шығыс Қазақстан облысы жоғары өнеркәсіптік және аграрлық әлеуетке ие екенін, бүкіл елдің әлеуметтік-экономикалық дамуына үлкен үлес қосып отырғанын атап өтті. Монументтің ашу құрметіне біздің атақты жерлестеріміз филология ғылымдарының докторы, Шәкәрім атындағы Мемлекеттік университеттің профессоры Арап Еспенбетов, жазушы Әлібек Қаңтарбаев және жеңіл атлетикадан Олимпиада чемпионы Ольга Рыпакова ие болды. Монументтің орталық бөлігінде Қазақстан Республикасының Тұңғыш Президенті – Елбасы Нұрсұлтан Әбішұлы Назарбаевтың Еліміздің Тәуелсіздігінің құндылығы туралы сөздері үш тілде жазылған.
"Қазақстанды өз Отанымен қабылдаған әрбір адамның ең ұлы мақсаты, ең қасиетті борышы - Қазақстан туын берік ұстау". 30 жыл бұрын Нұрсұлтан Әбішұлы болашақ ұрпақтар алдында үлкен тарихи жауапкершілікті мойнына алып, мемлекетіміздің дамуын ондаған жылдарға алға қойған міндеттерді айқындай отырып, аса маңызды саяси және экономикалық шешімдер қабылдады. Елбасының саясатын қолдай отырып, біз ұлы жетістіктерге қол жеткізіп, бүгінде өзімізді тәуелсіз, қуатты әрі табысты Қазақстанның азаматтары деп мақтанышпен айта аламыз.
Бүгін ҚР Тәуелсіздігінің 30 жылдығына арналған салтанатты жиында Мемлекет Басшысы Қасым-Жомарт Тоқаевтың Жарлығына сәйкес Премьер-министр Асқар Мамин шығысқазақстандықтарға мемлекеттік наградаларды тапсырды. Мен, сіздер сияқты, жоғары марапатқа ие болған жерлестерімізді мақтан тұтамын.
II дәрежелі "Достық" орденімен Шығыс қазақстан облысы Қазақстан халқы Ассамблеясының Қоғамдық келісім кеңесінің төрағасы Геннадий Пуссеп марапатталды. "Құрмет" орденімен Игорь Радович, Сергей Бежецкий, Әсем Мамутова, ұстаз Бағжамал Садықова марапатталды. III дәрежелі "Еңбек Даңқы" орденімен тракторшы Өміртай Әсіпов және бағалы металдардан жасалған бұйымдар учаскесінің гальванигі Людмила Гречухина марапатталды. "Ерен еңбегі үшін" медалімен жаттықтырушы-оқытушы Айдар Қайырбаев марапатталды.

• 21.12.2021
• 224