Маңғыстауда «Жомарт жүрек» сыйлығының лауреаттары марапатталды

23 желтоқсанда  Ел Тәуелсіздігінің 30 жылдығы аясында өңір басшысы Нұрлан Ноғаев «Жомарт жүрек» сыйлығының лауреаттарын құттықтады, деп хабарлайды Маңғыстау облысы әкімінің баспасөз қызметі.

Сыйлықты тапсыру рәсіміне пандемиямен күресте ерлік танытқан кәсіпкерлер, еріктілер және медицина қызметкерлері қатысты. 

Облыс әкімі жиналғандарды ел Тәуелсіздігінің 30 жылдығымен құттықтап, қамыққанға демеу, тарыққанға медеу болып жүрген азаматтарға ризашылығын білдірді. Сондай-ақ, пандемиямен күресте өз міндеттерін асқан жауапкершілікпен атқарған дәрігерлерге алғысын жеткізді.

- Осы жиында отырған азаматтардың барлығы бірлік пен ұйымшылдықтың арқасында кез-келген кедергілерді жеңе алатындығын көрсетті. Дәрігерлер, кәсіпкерлер және белсенді азаматтар бірігіп көптеген азаматтардың өмірін сақтап қалды. Тәуелсіздігімізді бекемдей түсуде жан-тәнімен аянбай қызмет етіп келе жатқан елжанды азаматтарымыздың арқасында біз болашаққа сеніммен қарай аламыз,-деді Нұрлан Ноғаев.
 
Жиын барысында денсаулық сақтау, әлеуметтік қорғау салаларында жемісті еңбек етіп, пандемия кезінде халық саулығы үшін алдыңғы шептен көрінген бірқатар азаматтар «Халық алғысы», «ҚР Тәуелсіздігіне 30 жыл», «Еңбек ардагері», «Денсаулық сақтау ісіне қосқан үлесі үшін» төсбелгілерімен марапаттады.

Сонымен қатар, салтанатты шарада «Жыл меценаты» номинациясымен Жаңаөзен қаласы бойынша Аналар кеңесінің төрайымы Т. Болатбаева, Түпқараған аудандық мәслихатының депутаты, «Ай-Ди строй» ЖШС директоры Н. Адеков және «Керемет» шаруа қожалығының басшысы Ж.Агисов марапатталды.

«Туған өлке» сыйлығына «БозашыТрансҚұрылыс» ЖШС басшысы Е.Кенған, «Қарағантүбек» ЖШС директоры А. Ескалиева, Маңғыстау облыстық мәслихат депутаты, «Қаражанбас» АҚ-ның «Бұрғылау және ұңғыларды жерасты күрделі жөндеу» басқармасында «Өндірісті қамтамасыз ету базасының» басшысы Б.Сәдуақас ие болды.

«Жылдың үздік ұйымы» номинациясымен «Фирдаус» еріктілер тобы, «Нейрон» ЖШС-нің емханысы және «Сакартвело» грузин этномәдени бірлестігі марапатталды.

«Жыл тұлғасы» номинациясын Ақшұқыр мектеп-лицейінің директоры Қ.Тлеубаева, «Софимед групп» медициналық-санитариялық алғашқы көмек орталығының директоры Н. Мусаев, «Чосон» корей этномәдени бірлестігінің мүшесі Тен Андрей марапатталды.

«Жылдың үздік қамқоршысы» атағымен Маңғыстау облысының бас имамы Ә.Елжанов, «Норт Каспиан Оперейтинг Компани Н.В.» («НКОК») компаниясы және Маңғыстау облысының ерекше жандарға арналған дене шынықтыру және спорт федерациясы ҚБ директоры М.Жарылғас марапатталды.

Мерекелік кеш жергілікті өнерпаздардың концерттік бағдарламасымен жалғасты.

• 24.12.2021
• 140