ҚР Энергетика министрі жергілікті қамтуды одан әрі дамыту жөніндегі шаралар мен бастамалар туралы айтты

2021 жылдың қорытындысына сәйкес көмірсутек шикізатын және уран өндіру бойынша жер қойнауын пайдаланушыларының тауарларын, жұмыстары мен көрсетілетін қызметтерін сатып алудың жалпы көлемі шамамен 6,8 трлн. теңге. Бұл ретте осы сатып алулардағы жергілікті қамту үлесі 46,5% құрайды. Бұл туралы бүгін, 28 желтоқсанда Орталық коммуникациялар қызметінде өткен брифингте Энергетика министрі Мағзұм Мырзағалиев мәлімдеді.

Ведомство басшысы ағымдағы жылы ТШО, Қарашығанақ Петролеум Оперейтинг және NCOC консорциумдары құрған мұнай-газ машинасын жасауды дамытудың халықаралық орталығы Қазақстанның мұнай-газ саласы үшін тауарлар өндірісін оқшаулауға кіріскенін атап өтті.

Қазіргі уақытта операторлардың ұсынысы бойынша орталық үш тауар тобын: бекіту арматурасын (клапандар), электротехникалық жабдықты, БӨА және А (бақылау-өлшеу аспаптары және автоматика) талдауға және оқшаулауға бағытталған.

Сондай-ақ ҚР Энергетика министрі Мағзұм Мырзағалиев биыл жергілікті қамтуды дамытудың Тікелей инвестициялар қоры құрылғанын еске салды. «Шеврон» компаниясы Республика алдындағы өзінің қайта инвестициялау міндеттемелері шеңберінде жергілікті қамтуды дамытуға    248,5 млн. АҚШ долларын бөлуде. Инвестициялар басымдылық технология мен IT, базалық тауарлар өндірісі және мұнай-газ секторына арналған жабдықтардың жекелеген түрлерін құрастыру және қоршаған ортаны қорғау  үш бағыты бойынша салынатын болады, бірақ олармен шектелмейді.

Бүгінде Қор «Астана» халықаралық қаржы орталығының алаңында тіркелген. Өтінімдерді қабылдау а.ж. 29 желтоқсанында Шеврон жергілікті қамтуды дамытудың тікелей инвестициялар қорының сайтында басталады.

«Осындай бастамалардың арқасында біз мұнай-газ саласы үшін тауарлар өндірісінің өз жүйесін құруымыз керек», - деп түйіндеді министр.

• 28.12.2021
• 295