Қазгидрометтің тарихи мұражайы ашылды

Құрметті достар, Қазақстанның ұлттық гидрометеорологиялық қызметінің ғасырлық мерейтойы қарсаңында, ҚР Экология, геология және табиғи ресурстар министрі — Серікқали Брекешев салтанатты түрде Қазгидрометтің тарихи мұражайын ашқанын қуана хабарлаймыз.

Ауа райын бақылаудың бүкіл тарихымен, енді жаңа мұражайдың экспозициясынан көру арқылы танысуға болады. Бұнда — тарихи аспаптар, біздің метеорологиялық станциялардың халықаралық деңгейде мойындалуының дәлелі — түрлі сертификаттар, өткен жылдардың фотосуреттері мен құжаттары жинақталған.

Айта кетсек, 100 жыл бұрын, 1922 жылдың қаңтарында Орынборда қазақстандық метеорологиялық бюро (Қазметбюро) құрылды. Жалпы, Қазақстан аумағындағы алғашқы метеорологиялық бақылаулар ХІХ ғасырдың ортасынан басталып, 1848 жылы Қазалы станциясында, 1854 жылы Семей станциясында, 1856 жылы Ырғыз және Қызылорда станцияларында, 1859 жылы Алматы және Орал станцияларында тіркелді. Солайша, ХХ ғасырдың басында 28 станция жұмыс істеді.

Ал бүгінгі күні жерүсті бақылау желісі 347 метеорологиялық станцияны құрайды, бұл Қазақстан аумағын 78% метеорологиялық мониторингпен қамтиды.

Мұражайдың ашылуы "Қазгидромет" РМК-ның 100 жылдығын мерекелеу бойынша бірқатар іс-шараларға орайластырылған.

• 31.12.2021
• 237