Нұрлан Ноғаев: Президенттің берген тапсырмасын неғұрлым сапалы орындасақ, соғұрлым тұрақты жағдайға тез ораламыз

Бүгін, 9 қаңтарда облыс әкімі Нұрлан Ноғаев Ақтау қаласының аумағындағы блок-бекеттерді аралап көрді, деп хабарлайды Маңғыстау облысы әкімінің баспасөз қызметі. 

Маңғыстау облысында төтенше жағдай режимін қамтамасыз ету мақсатында аймаққа 8 блок-бекет қойылды. Атап айтсақ, 

1. Ақтау қаласы - Құрық кенті автожолы, "Демалыс базасы" қиылысы;
2. Ақтау қаласы-Жетібай кенті автожолы , "Нұржан" кафесі;
3. Баянды-Емір автожолы;
4. Ақтау-Форт-Шевченко автожолының 43 шақырымы;
5. "Ивушка" демалыс базасының қиылысы;

Жаңаөзен қаласы бойынша - 3 блок-бекет

6. Жаңаөзен қаласы-Жетібай кенті автожолы, Қарамандыбас қиылысы, 35-ші шақырымында;
7. Жаңаөзен қаласы - Қызылсай кенті автожолының 3-ші шақырымында;
8. Жаңаөзен қаласы-Құланды кенті  автожолының 5-ші шақырымында.
Арнайы жасақ сарбаздары өңірге келе жатқан әр бір көлікті тоқтатып, азаматтар мен көліктерді жіті тексеруде. Әзірге ешқандай құқық бұзушылық тіркелмеген. 

Әскери қызметшілер азаматтар мен көліктерді мұқият қарап, тексеру жүргізеді. Бүгінде ешқандай құқық бұзушылық тіркелген жоқ. 

Аймақ басшысы блок-бекеттерді қарап шығып, адамдардың өмірі мен денсаулығын сақтау үшін осындай шаралар қабылданып жатқанын атап өтті.

- Ел Президенті Қасым-Жомарт Кемелұлының жарлығымен төтенше жағдай жарияланған болатын. Төтенше жағдайдың талаптарына сәйкес осы типтес блок-бекеттер қойып, жүруді шектеп, азаматтардың өміріне, денсаулығына қауіп төнбейтіндей жағдайды қалыптастыру жұмыстары ұйымдастырылды. 

 Осы орайда тұрғындардан бірінші кезекте сабырлық танытып, түсіністік білдіргендері үшін рахмет айтамын және қазіргі таңда төтенше жағдайдың талаптарын қатаң сақтауды сұраймын. Бұл уақытша кезең. Біз неғұрлым ұйымдасқан түрде, түсіністік танытып Президенттің берген пәрменін сапалы орындасақ, соғұрлым тұрақты жағдайға келеміз.
Егер қандайда бір келеңсіз жағдайды, құқық бұзушылықты байқап қалсаңыз полиция қызметкерлеріне, әкімдік қызметкерлеріне хабар беруіңіз сұралады- деді Нұрлан Ноғаев.

• 11.01.2022
• 137