Нұрлан Ноғаев: Террористік шабуылдар кезінде Президенттің қабылдаған әрбір шешімі елді құтқаруға бағытталды

11 қаңтарда облыс әкімі Нұрлан Ноғаевтың төрағалығымен Мемлекет Басшысы Қасым-Жомарт Тоқаевтың ҚР Парламенті Мәжілісінде берген тапсырмаларын іске асыру бойынша кеңес өтті, деп хабарлайды облыс әкімінің баспасөз қызметі. Отырысқа облыстық, қалалық мәслихат депутаттары, облыстық, қалалық қоғамдық кеңес мүшелері, саяси партиялар филиалдарының төрағалары және жергілікті атқарушы органдардың басшылары қатысты. Нұрлан Ноғаев Мемлекет басшысының саяси және әлеуметтік-экономикалық салалардағы өзекті мәселелерді шешу жөніндегі тапсырмаларына тоқталды. Ол азаматтық қоғамды дамыту мәселелерін жетілдіру қажеттігін атап өтті. - Мемлекет басшысы Қасым-Жомарт Кемелұлы Тоқаевтың осы күндері қабылдаған әрбір шешімдері, әрбір қадамы ел тағдырын қорғауға және сақтауға бағытталған. Президент атап өткендей, біз әлеуметтік саясатты жаңа жағдайға бейімдеуіміз керек, білікті мұғалімдерсіз білім сапасын көтеру мүмкін емес, осы орайда біз білім сапасын жақсарту арқылы инженерлер мен өндіріс саласында қызмет етушілердің жаңа буынын дайындау үшін бар күшімізді салуымыз керек. Сонымен қатар, Президент үздік педагогтарды тарту бағдарламасын әзірлеуді жүктеді. Бұл біздің өңірдегі білім саласының дамуына, білім сапасының жақсаруына тың серпін бермек,- деді облыс әкімі. Сонымен қатар, аймақ басшысы Нұрлан Ноғаев өңір ақсақалдарына, қоғам белсенділеріне, спортшыларға, депутаттарға, қоғамдық кеңес мүшелеріне, құқық қорғау органдарының қызметкерлеріне, жастар мен қала еріктілеріне алғысын білдіріп, елді ауызбіршілікке, бірлікке және қоғамдық тәртіпті сақтауға шақырды. - Халықтың қолдауының арқасында, тұрғындардың түсіністік танытуының арқасында біз ешқандай оқыс оқиғаларға орын берген жоқпыз. Сондай-ақ бұл күндері өңірдегі ауруханалар, емханалар, балабақша мен коммуналдық мекемелердің жұмысы тоқтаған жоқ. Үздіксіз халыққа қызмет етті. Бұл азаматтардың да еңбектерін жоғары бағалаймыз. Осындай қиын кезеңде күшіміз бірлікте екендігін тағы бір дәлелдедік, -деді Нұрлан Ноғаев.16709:28

• 12.01.2022
• 165