Қарағанды облысында шахтерлердің талаптары қалай орындалуда

«Абай» шахтасындағы қайғылы оқиғадан кейін келісім комиссиясы қабылдаған талаптарды талқылау үшін «АрселорМиттал Теміртау» шахтерлерінің бастамашыл тобымен кезекті кездесуді өткіздім.

Шахтер ұжымдарының барлық мәселелері менің жеке бақылауымда.

Бүгінгі таңда компания 12 талаптың көпшілігін орындады. Сондай-ақ персоналдың нормативтік санына, жабдықтың техникалық аудитін ескере отырып, инвестициялық бағдарламаны жаңартуға қатысты тармақтар бойынша жұмыс жүргізілуде.

Көлік паркін жаңарту үшін бес жаңа автобус жеткізілді. Алдағы уақытта тағы жеті автобус әкелінеді. 2022-23 жылдары компания 56 заманауи автобусты сатып алуға уәде берді.

Бүгінде кеншілер мен металлургтерге арналған жеңілдетілген ипотекалық бағдарлама аясында кәсіподақтар 67 адамның тізімін берді. Ал наурыз айының басында бағдарлама іске қосылады деп күтілуде. Облыстық бюджеттен бөлінген бір миллиард теңгеге қоса, «Отбасы банк» тағы 700 млн теңгеден кем емес қаржыны бөледі.

Кездесуде шахтер отбасылары тұратын моноқалалардың дамуы талқыланды.

Шахтинск қаласында бес қабатты үйдің құрылысын аяқтау жоспарлануда, онда пәтерлердің бір бөлігін шахтерлердің отбасылары ала алады. Сондай-ақ қалалық мәдениет және демалыс саябағын абаттандыру жұмыстары аяқталып, Абай даңғылын жөндеу жұмыстары басталады. Шахтерлердің өтініші бойынша Шахтинск қаласында заманауи хоккей корты салынады.

Ал Саранда Ақтас кентінен басталатын газдандыру жұмыстары жүргізіледі.

Сонымен қатар Абай ауданында «Абай» шахтасына апаратын жолды жөндеу жұмыстары аяқталады. Кеншілер өз сөздерінде Вольный кентінде дәріхананың жоқтығын тілге тиек етті. Сондай-ақ «Абай-Вольный-Қызыл» бағыты бойынша автобус рейстерінің санын көбейтуді сұрады. Бұл туралы аудан әкіміне тиісті тапсырманы бердім.

Қолға алынған бұл іс-шаралардың орындалу барысы бақылауда болады. Бір айдан кейін кеншілермен қайтадан кездесеміз.

• 02.02.2022
• 251